सौ. स्नेहा देशपांडे पतकी
मनमंजुषेतून
☆ “साडी खरेदी.. एक आनंदाची पर्वणी…” ☆ सौ. स्नेहा देशपांडे पतकी ☆
घरातील फराळ, मग नवरा मुले, सासुसासरे, नणदा, आला गेला, पै पाहुणा, अंगतुक या सगळ्यांचा विचार झाल्यावर लागतो तो तिच्या साडीचा नंबर, पण याचे तिला अजिबात वाईट वाटत नाही उलट धन्यताच वाटते.
मग सुरु तिच्या साडी खरेदीचा प्रवास…
आधी ती मैत्रिणीच्या कडे चौकशी करते, कुठे काय चांगले आहे वगैरे…
मग होते दुकानाची निवड
सेम चॉईस वाली मैत्रीण सोबत असेल तर सोनेपे सुहागा पण
कुणीच नसेल तर मग नवरा असतोच हक्काचा.
(हा के हा एवढंच ऑप्शन असलेला)
रंग, पोत, प्रकार सगळे काही तिने मनात ठरलेलं असते.
प्रत्यक्षात दुकानातल्या साड्या बघून तिच्या मनाची चलबिचल होतेच.
मग काठ पदर असेल तर पैठणी, नारायण पेठ, कांजीवरम, धर्मावरम माहेश्वरी, इरकल, जिजामाता, यातून एखादी आवडलीच तर बाजूला काढून ठेवली जाते.
तशी ती चोखंदळ असल्याने दुकानदाराने साड्या काढून आणे पर्यंत सभोवार नजर फिरवून घेते. कुणाच्या हातात काय आहे, पलिकडचा सेल्समन जास्त चांगला स्टॉक दाखवतोय का, असे सगळे निरीक्षण सुरूच असते.
मग रॅक मधल्या साड्या
असे सगळे बघून घेते.
मग मोर्चा फॅन्सी व्हरायटी कडे वळतो.
काठ पदर फार झाल्या. असे म्हणत मोर्चा वळतो ते फॅन्सी साड्यांकडे.
टिश्यू, ऑर्गन्झा, बाटिक, बांधणी, एम्ब्रॉयडरी, टिकली वर्क, जॉर्जेट, लिनन अजरक, बांबू सिल्क….. असे अनंत प्रकार सेल्समन फारच लीलया दाखवत सुटतो.
त्याने जणू शिवधनुष्यच उचलेले असते.
कुठल्या साडीने तुमच्या चेहऱ्याचा रंग खुलतो त्याने बरोब्बर ओळखलेले असते. क्षणभर तिला वाटून जाते की नवऱ्याला असे मनातले ओळखता आले असते तर किती बरे झाले असते. असो.
मग बरोब्बर तुम्हाला तो तशी साडी काढून देतो.
पण इकडे तिने तिचे नेहमीचे काम नेटाने चालू ठेवलेले असते.
या प्रकारात अजून रंग आहेत का
यात वेगळा काठ आहे का
रंग जरा भडकच वाटतोय
या रंगात हे डिझाइन नाही का…………
असे चोखंदळ वाटावे असे काही तरी डिमांड करत राहते
सेल्समन पण तोडीस तोड असतो
हा बघा. बेबी पिंक, ओनियन पिंक, इलायची ग्रीन, केळी ग्रीन, बर्गंडी, माजेंठा, रज्वाडी ऑरेंज, ऍपल ग्रीन, पेट्रोल ब्लू अशी ऐकिवात नसलेली नावे भराभर तोंडावर फेकतो.
ते ऐकून तिलाही करेक्ट दुकान आणि करेक्ट सेल्समन निवडल्याचा अभिमान जागृत होतो.
नवरा बिचारा या दोघांच्या जुगलबंदीत कोण जिंकते ते निमूट बघत बसतो.
शेवटी एकदा यतल्या आवडलेल्या साड्या घेतल्यानंतर सेल्समन पुन्हा म्हणतो ताई
जाता जाता पैठणी variety बघता का आत्ताच bundle फोडले. अजून रेट पण नाही लावले. बघा एखादी आवडली तर…
हे ऐकून नवऱ्याला मनात वाटत असते ए ताईच्या भावा गप न बे……..
कारण खरे तर ते १० वे bundle सुद्धा असू शकते. पण बंडल बांधण्यात आणि मारण्यात तो पटाईत असतो…..
मग काय पुन्हा पैठणी
कडीयाल, मोर बुट्टा, मुनिया, ट्रीपल मुनिया, चंद्रकोर, हॅण्डलूम, पॉवरलूम, कॉटन पैठणी,….. असे नवीन parcle शिवाय जुन्या स्टॉक मधलेही खूप काय काय समोर येते.
मग काय
त्याला मान देऊन तीही दिमाखात एखादी पैठणी निवडतेच. आणि सेल्समन आजचे टार्गेट पूर्ण झालेले असते.
बरंच वेळ मोबाईल बघत बसलेल्या नवऱ्याची तिला आठवण होते. साहजिकच त्याच्याकडे बिलाची जबाबदारी देऊन, कृतकृत्य झाल्याचा चेहरा करून स्वारी साडी खरेदीच्या आनंदाची पर्वणी लुटून घरी येते.
ही साठा उत्तराची कहाणी इथेच संपत नाही बरे
मग सुरू होतो तो
ब्लाऊज शिवणे, मॅचिग दागिने पर्स, चप्पल…….
यांचा न संपणारा प्रवास…………
© सौ. स्नेहा देशपांडे पतकी
कोल्हापूर
मो. 9823390516
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
