श्री आशिष बिवलकर
चित्रकाव्य
|| जाब विचाराया नाही आलो… || श्री आशिष बिवलकर ☆
☆
काय विठ्ठला,
पंढरी तुझी भक्तांनी सजली!
ओल्या डोळ्यांनी आलो,
पावसाने भाकरी माझी भिजली!
*
शेतात कष्ट करून,
जगाला म्हणे आम्ही पोसतो!
नुकसान झालया,
नशिबाचा फेरा नेहमीच सोसतो!
*
आषाढीला आलो होतो,
मागितलं चांगल पीक पाणी!
आभाळच कोसळलं,
आम्हा उरला ना वाली कोणी!
*
कसली दिवाळी- दसरा,
चिंधी नाही घेतली लेकराबाळा!
फाटकंच लुगडं नेसलं तिनं
कारभारीण हात लावी कपाळा!
*
गोडधोड केल नाही लेकराना,
दोन वेळ अन्नाची उरली भ्रांत!
देवा रडगाणंच म्हण माझे,
कसा राहू मी आता तरी शांत!
*
जाब विचाराया नाही आलो,
पंढरीनाथा तुझ्या दारात!
माऊलीच तू माझी,
घे दुःख लेकराच पदरात!
*
बळ दे झुंजायला,
साकडं घालतो आता!
परीक्षा नको घेऊ,
चरणी टेकतो माथा!
©️ वास्तवरंग
☆
(चित्र सौजन्य – श्री आशिष बिवलकर)
© श्री आशिष बिवलकर
बदलापूर
मो 9518942105
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
