श्रीशैल चौगुले
कवितेचा उत्सव
☆ कवीची कविता... ☆ श्रीशैल चौगुले ☆
☆
जाता-जाता सहज लिहीता
शब्दासंगे होईल कविता
निळे आभाळ, हिरवी धरा
मनातली सरिता-सविता.
*
सहा ऋतूतले रत् भोळे
शब्द माझे मोहिती कोकिळे
रान पिकातून फुलपाखरे
भृंगर गुंजन काव्यांचे चाळे.
*
प्रहर-प्रभाती भुपाळी सुचे
सोनेरी शब्दांचे ते भाव रचे
चिव-चिव पाखरेही अंगणी
चिंतन चटकन शब्द वेचे.
*
अक्षर पिसारे फुलते स्पंदनी
हृदय सुखावे ओहोळ प्रवाही
अलगद उन्हात झुले सावली
वैशाखातही काव्य मोद ग्वाही.
*
पाऊस हलका शब्दात खेळे
श्रावण येता कवितांचे मेळे
चंद्रात चांदणे शरद गाणे
हेमंती मग छंदातच लोळे.
*
आता सांजवेळी उगी नजर
आठवणीसंगे शब्दा पाझर
सरते असेच कवितेचे वय
वड-पिंपळ काव्याला गोजिर.
☆
© श्रीशैल चौगुले
मो. ९६७३०१२०९०.
≈ संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
