रेणुका धनंजय मार्डीकर
चित्रकाव्य
ही जिवतीची पणती… रेणुका धनंजय मार्डीकर ☆
☆
रानात दिसती वेलीत हसती
रानभाजीची फुले
नाजूक चांदण्या देखण्या देखण्या
पाहून मन माझे खुले
*
पावसाच्या सरीत वारा भिरभिरित
वेलींवर हिंदोळे घेती
झुपक्यात देखणे फुले नजराणे
चैतन्य जणू हे देती
*
जंगलची राणी किती देखणी
चवीला रुचकर मेजवानी
फुलांना खुडता झिरमिर येते
झिरमिर पावसाचे पाणी
*
डुडी कुणी म्हणती हिला
झटुलीही म्हणती
झुटेल, दवडी आणि
शेरी म्हणून गणती
*
दाटी वाटी किती हिची
हिरव्या बदामात बाई
पर्णपाती दाट किती
गगनाला उंच जाई
*
शुभ्रांगी दिसते कधी
कधी हसते पोपटली
ओंजळ भरून घेता
गोरी गोरी दिसते कळी
*
दीर्घायु वेल असे
आदिवासी मान देती
जिवतीची पणती ही
आरोग्य देणारी खाशी
☆
© रेणुका धनंजय मार्डीकर
औसा.
मोबा. नं. ८८५५९१७९१८
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
