श्री शरद कुलकर्णी
कवितेचा उत्सव
☆ झाडांनो तुमच्यासाठी… ☆ श्री शरद कुलकर्णी ☆
☆
होउन कोवळी उन्हे
पानांचे करीन सोने.
झाडांनो तुमच्यासाठी.
*
होउन सुगंधी वारा
मोहरुन पर्णसंभारा.
झाडांनो तुमच्यासाठी.
*
होउन पक्षी उन्मुक्त
गाईन छंदमुक्त.
झाडांनो तुमच्यासाठी.
*
होउन चंद्र पूनवेचा
वर्षाव करीन चांदण्याचा.
झाडांनो तुमच्यासाठी.
*
होउन पाऊस थेंबथेंब
भिजवीन अंग चिंब.
झाडांनो तुमच्यासाठी.
*
होउन शिशिर अंतरीचा
ऋतू खास पानगळीचा.
झाडांनो तुमच्यासाठी.
*
होउन झाड जगेन
मैत्रेयाचे भान ठेऊन.
झाडांनो तुमच्यासाठी.
☆
© श्री शरद कुलकर्णी
मिरज
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
