कविराज विजय यशवंत सातपुते
कवितेचा उत्सव # 193 – विजय साहित्य
☆ जपणूक.. ! ☆ कविराज विजय यशवंत सातपुते ☆
☆
येता पालवी वयात
पान झाडाचे पिकते
सोने होता आयुष्याचे
जग हिरवे दिसते.. ! १
☆
ज्येष्ठ होता आप्त कुणी
नका करू अवमान
स्वभावाचे गुणदोष
जाणा माणूस महान.. ! २
☆
घाला स्वभावा मुरड
टाळा विक्षिप्त वागणे
नव्या डहाळीच्या कानी
गूज मनीचे सांगणे.. ! ३
☆
आरोग्याचे ताळतंत्र
संयमाची धन्वंतरी
योग्य आहार विहार
औषधांची मात्रा खरी.. ! ४
☆
तपासणी नियमित
तन मन जपताना
नातवांची जपू साय
ज्येष्ठपर्वी रमताना.. ! ५
☆
अनुभव सफलता
सुख समाधान शांती
नको वृद्धाश्रमी धन
जपू ज्येष्ठांना धामांती.. ! ६
☆
© कविराज विजय यशवंत सातपुते
सहकारनगर नंबर दोन, दशभुजा गणपती रोड, पुणे. 411 009.
मोबाईल 8530234892/ 9371319798.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
