सौ राधिका भांडारकर
चित्रकाव्य
– मुक्ता… – ☆ सौ राधिका भांडारकर ☆
☆
बंधनमुक्ता आनंदमयी
बेभान किती स्वानंदसुखी
धारा धारा घे अंगावरी
तल्लीन होय ती चंद्रमुखी.. १
*
एक नाद तो घुमघुम वाजे
गडगड मेघा ताल देतसे
त्या तालावर बेभान तिचे
नाचणे कसे हे रंगतसे.. २
*
नाते जुळता त्या धारांशी
मिठीत जाता मग वरुणाच्या
आनंद खरा तो जाणवतो
चिंता सरती आयुष्याच्या.. ३
*
नाच नाच गे घुमा म्हणवितो
विसर विसर गे पदात बेड्या
धुंद हो स्वैर पावसात तू
भय कशास हे मनात वेड्या.. ४
*
देहावरच्या स्पर्शात ओल्या
नाहतेस तू चिन्मय कळी
थेंब थेंब हे वरदानाचे
घे साठवून तुझ्या ओंजळी.. ५
☆
© सौ. राधिका भांडारकर
ई ८०५ रोहन तरंग, वाकड पुणे ४११०५७
मो. ९४२१५२३६६९
radhikabhandarkar@yahoo.com
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
