सुश्री वर्षा बालगोपाल
☆ “मैत्रीची बँक…” ☆ सुश्री वर्षा बालगोपाल ☆
नुकत्याच साजऱ्या झालेल्या जागतिक मैत्रीदिनाचे औचित्य साधून सुरू करत आहोत…… “मैत्रीची बँक “…… या मैत्रीच्या बँकेत आपले स्वागत आहे.
आमची वैशिष्ट्ये आणि सुविधा खालील प्रमाणे – –
०१) ही मैत्रीची बँक २४ तास आपल्या सेवेसाठी सज्ज आहे.
०२) खुशाल यावे आणि आपल्या विश्वासाने ठेवावी प्रेमाची कायमस्वरूपी ठेव आणि हक्काने वसूल करावे मैत्रीचे व्याज. ते पण चक्रवाढीच्या स्वरूपात.
०३) येथे होतात गप्पा टप्पांचे दैनंदिन व्यवहार. शंका कुशंका ठेवाव्या आणि सल्ला मसलत मिळवावी.
०४) आम्ही देतो निखळ आनंदाचे ऋण आणि आपला आनंद हीच आमची परतफेड.
०५) आम्ही स्विकारतो सुखद क्षणांचे धनादेश आणि त्याचे मूल्य आमचे आम्हीच अब्जावधी मधे ठरवतो.
०६) जेथे जाऊ तेथे जेव्हा पाहिजे तेव्हा आणि जितके पाहिजे तितके प्रेम मिळावे म्हणून ATM सेंटर्स पण आहेत. हे ATM म्हणजे असू तेथे मजा अशा स्वरूपाची आहेत.
०७) आपल्या हास्याचा सुखाचा समाधानाचा दागीना आम्ही आमच्या सेफ लॉकरमधे सुरक्षीत ठेवतो आणि या लॉकरची चावी तुमच्याच हातात देऊन केव्हाही लॉकर उघडायची मुभा दिली आहे.
०८) कोणतेही पुरावे न मागता आम्ही खुषीच्या ओव्हरड्राफ्टची सोय केली आहे.
०९) अशा सुंदर बँकेमधे आपले असंख्य मित्र मैत्रिणींचे खाते असल्याने या खातेधारकांशी मदतही आपल्याला मिळू शकेल.
१०) या बँकेचा ताळमेळ सहसा कुणाला साधत नाही. पण विश्वासाच्या ठेवी, प्रेमाची गुंतवणूक सुख समाधानाची राशी आणि मदतीचे देणे हास्याचा नफा यांच्यासह समतोल आपोआप साधला जातो.
अशा सुंदर बँकेचे आपण खातेधारक आहात. तेव्हा या बँकेची नियंत्रक या नात्याने आपणास या बँकेच्या यापुढच्या प्रत्येक वर्धापन दिनाच्या शुभेच्छा आत्ताच देते.
☆
© सुश्री वर्षा बालगोपाल
मो 9923400506
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
