सूचना/Information
(साहित्यिक एवं सांस्कृतिक समाचार)
प्रा.सौ.सुमती पवार
🪻 अभिनंदन 🪻
आपल्या समुहातील ज्येष्ठ साहित्यिका प्रा. सुमती पवार यांच्या, मानस, इंद्रा आणि नक्षत्र या तीन कवितासंग्रहांचे नुकतेच प्रकाशन झाले आहे. साहित्य क्षेत्रातील त्यांच्या या कामगिरीबद्दल ई अभिव्यक्ती परिवारातर्फे त्यांचे मन: पूर्वक अभिनंदन आणि पुढील प्रकाशनासाठी हार्दिक शुभेच्छा.
आज त्यांची एक नवीन कविता “भेट आपुली ती पहिली…“, ‘कवितेचा उत्सव‘ या सदरात देत आहोत.
संपादक मंडळ
ई अभिव्यक्ती मराठी
☆ ☆ ☆ ☆ ☆
कवितेचा उत्सव
☆ भेट आपुली ती पहिली… ☆ प्रा.सौ.सुमती पवार ☆
☆
आठवते भेट मला भेट आपुली पहिली
लाजेने मी चूर चूर नजर नाही उचलली…
माती कोरत राहिले, शब्द नेती माझ्या ओठी
भेटीची ती ओढ अशी हुरहुर लागे पोटी..
*
न बोलताच बोलणे मौनातच सारे आले
समजत होते तुला मन माझे भांबावलेले…
मिष्किल नजर तुझी डोळ्यातही हसू होते
अस्फूट ते तुझे ओठ गोड किती होते नाते…
*
नाही पाहिले हो पूर्वी तरी ओढ का लागते
हृदयात काठोकाठ प्रेम का हो ओसांडते…
जीवाशिवाची का भेट देवादारी ठरवली
एका ह्याच नात्यासाठी मायबापे दुरावली..
*
वरचढ ठरे नाते अशी कोणती पुण्याई
जन्मदिला वाढवला त्यांना सोडूनच जाई…
जीव जीवात गुंततो नवे जीव येती घरा
अशी चाले घरोघरी मायबाप परंपरा…
*
ठेचा लागल्या हो किती पूर्णत्वाला नेती थेट
हात हातात घालून दूर जरी दिसे वाट
सुखदु:खे घरोघर मातीच्या चुली असती
पळसाला पाने तीन निभाऊन सारे नेती…
☆
© प्रा.सौ.सुमती पवार
नाशिक
मो. ९७६३६०५६४२; ईमेल – svpawar6249@gmail.com
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
