श्री अशोक श्रीपाद भांबुरे
अशोक भांबुरे जी यांची कविता अभिव्यक्ती # 296
☆ सांगतेचा सोहळा… ☆ श्री अशोक श्रीपाद भांबुरे ☆
☆
कौतुकाची केवढी बरसात आहे
सांगतेचा सोहळा दारात आहे
*
माणसांचाही इथे करतात कचरा
काम होता टाकती केरात आहे
*
सोडले मी नाव बापाचे नि घरही
अन् तरी संस्कार त्या नावात आहे
*
या घराला रूप आलेले नवे हे
टाकलेला प्राण तू देहात आहे
*
जीव आतुर शब्द आई ऐकण्याला
आणला मी प्राण हा कानात आहे
*
नोकरीची लालसा घेऊन गेली
आज आला तो पुन्हा गावात आहे
*
लादलेले युद्ध आहे माणसांनी
त्यामुळे माणूसपण धोक्यात आहे
☆
© श्री अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
