श्री अशोक श्रीपाद भांबुरे
अशोक भांबुरे जी यांची कविता अभिव्यक्ती # ३४०
☆ देशभक्तिचे वेड… ☆ श्री अशोक श्रीपाद भांबुरे ☆
☆
देशभक्तिचे वेड लागले पुजतो आहे
रणांगणावर देशासाठी लढतो आहे
*
युद्ध खेळणे केवळ नाही काम एवढे
कुठल्याही कामाचे नसते इथे वावडे
पूर वादळा सोबतसुद्धा झटतो आहे
रणांगणावर देशासाठी लढतो आहे
*
पालन नियमांचे करण्याची सक्ती आहे
देशावरती नितांत कायम भक्ती आहे
म्हणून आम्ही धारातीर्थी पडतो आहे
रणांगणावर देशासाठी लढतो आहे
*
डोंगर सोडा हिमालयावर चढतो आम्ही
कण वाळूचे तप्त जाळती जळतो आम्ही
देशासाठी आनंदाने भिजतो आहे
रणांगणावर देशासाठी लढतो आहे
*
या पायांना हिरवळ सांगा कोठे दिसते
ढग युद्धाचे नसतानाही पळपळ असते
ओझे असते पाठीवरती पळतो आहे
रणांगणावर देशासाठी लढतो आहे
*
विझण्यासाठी आम्ही पेटुन उठतो येथे
देशासाठी बाधा ठरती काही नेते
विचार त्यांचा मनास अमुच्या छळतो आहे
रणांगणावर देशासाठी लढतो आहे
☆
© अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
