प्रभा सोनवणे
कवितेच्या प्रदेशात # ३३१
☆ माझा भारत…🇮🇳 ☆ प्रभा सोनवणे ☆
☆
शाळेत असताना पाहिला होता—
मनोजकुमारचा शहीद!
तेव्हापासून वीर भगतसिंगाची
राष्ट्रभक्ती,
काळजात खोलवर रुतलेली!
भगतसिंग, राजगुरु, सुखदेव!
देशासाठी प्राण अर्पून,
अमर झालेले!
इंग्रजाच्या जुलमी सत्तेविरुद्ध,
पुकारले होते बंड,
अनेक नौजवानांनी !
त्या राष्ट्रभक्तीने झपाटलेल्यांनी
दिली सर्वस्वाची आहुती !
खूप दिवस आठवत राहिली,
ती तीन क्रांतिवीरांची फाशी—
आणि
“मेरा रंग दे बसंती चोला….”
चे स्वर!
सतत येत होते रडू… !
दुसर्‍याच दिवशी शाळेत
म्हटलेली प्रतिज्ञा—
“माझ्या देशावर माझे प्रेम आहे
माझ्या देशातल्या समृद्ध आणि
विविधतेने नटलेल्या
परंपरांचा मला अभिमान आहे…..”
तेव्हाही ते शहीदच आठवले होते !
आज खूप दिवसांनी ते दिवस
आठवले…..
तसे पंधरा ऑगस्ट साजरा करताना—
आठवतेच की सारे,
वर्षानुवर्ष !
पण आज,
पुन्हा आठवले–
ते बलिदान,
काळजात रुतून बसलेले शहीद!
आणि सद्यस्थितीतही–
म्हणावेसे वाटले—-
माझा भारत महान!
☆
© प्रभा सोनवणे
संपर्क – “सोनवणे हाऊस”, ३४८ सोमवार
पेठ, पंधरा ऑगस्ट चौक, विश्वेश्वर बँकेसमोर, पुणे 411011
मोबाईल-९२७०७२९५०३, email- sonawane.prabha@gmail.com
≈संस्थापक संपादक – श्री हेमन्त बावनकर/सम्पादक मंडळ (मराठी) – उज्ज्वला केळकर/श्री सुहास रघुनाथ पंडित / मंजुषा मुळे/ गौरी गाडेकर≈
खूप छान!