वाचताना वेचलेले
☆ दुसरे मी काय केले? – लेखक : अज्ञात ☆ प्रस्तुती – सौ. दीप्ती गौतम ☆
☆
एक दिवस लेकीला आई बोले –
रांधा, वाढा, उष्टी काढा
दुसरे मी काय केले?
*
लेक म्हणे हसून,
श्लोक, ओव्या, सुरेल गाणी
तूच ना आम्हा ऐकवलेस?
स्वच्छ वाणी, सुरेल शब्द
भांडार तूच खुले केलेस
*
तुझा स्वयंपाक बघून बघून
मलाही लागली गोडी,
तुझ्यातली अन्नपूर्णा
माझ्यातही आली थोडी.
*
संस्कार वर्गात नाही जावे लागले आम्हाला! कसे वागावे, कसे बोलावे ठेवा तुझाच सर्वांना!
*
नव्हते यू ट्यूब, नव्हते गुगल,
तरी काहीच अडले नाही
तुझ्यासोबत. बोलताना
गोष्टी कधीच संपल्या नाहीत.
*
सण, सोहळे, लग्नकार्य
तुझेच इव्हेंट मॅनेजमेंट
जमाखर्च, देणीघेणी
तूच शिकवलीस ॲडजेसमेंट
*
आमच्या छोट्या दुखण्यांसाठी
डाॅक्टर आमचा तूच होशी
ओवा, हळद, शेपा, हरडा
आजही असते माझ्यापाशी
*
तुझी रांगोळी, तुझे भरतकाम
कलात्मकता शिकवून गेली
माहीत नाही कशी केव्हा
सुंदरता या जीवनी आली.
*
पै पाहुण्यात वाढलो म्हणून
कंटाळा आजही येत नाही,
माणसं जोडण्याची कला.
जणू जगण्याचाच भाग होई!
*
तरीही आई आता असं का म्हणतेस
आयुष्यात मी काय केले?
तुझ्याशिवाय का गं आई
माझ्यातल्या कळीचे फूल झाले?
☆
कवी:अज्ञात
प्रस्तुती : सौ. दीप्ती गौतम
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
