डॉ. ज्योती गोडबोले
वाचताना वेचलेले
☆ कालाय तस्मै नमः… कवयित्री : सौ. नंदिनी देव ☆ प्रस्तुती – डॉ. ज्योती गोडबोले ☆
☆
☆ आई.. ☆
*
आई विचारी लेकीला
घालू का तुझा खोपा?
देऊ का गं तुला मी
छान श्रावण झोका?
*
छानशी नेसवू का
साडी नऊवारी?
सजतील किती छान
तुमच्या मंगळागौरी॥
*
तुझ्या गं जीवलग
सख्यापार्वत्या बोलाव ।
सणावाराचे दिवस
आनंदात घालव॥
*
झेल बघ अंगावर
मस्त श्रावणधारा ।
घे श्वासात भरून
ताजा मोकळा वारा॥
*
खीर पुरणपोळी
करते तुझ्यासाठी ।
ये की माहेरपणास
लेकी माझ्यासाठी!
*
येता माहेरवाशीण
सवाष्ण मी घालीन ।
पुरणावरणाचं ताट
तुझ्यापुढे ठेवीन॥
*
शुक्रवारच्या छान छान
कहाण्या मी वाचीन ।
पुन्हा एकदा तुझ्यासह
लहान होऊन जाईन॥
*
झिम्मा फुगडी खेळू
करू थोडा दंगा ।
घालेन मग मी थोडा
आठवणींचा पिंगा॥
*
☆ लेक… ☆
*
नको गं आई तू
भलतंच बाई बोलू ।
नको बरं कसलाच
उगाच घाट घालू॥
*
नोकरी महत्त्वाची!
कुठून मिळवू रजा?
कसले सणवार अन्
कसली आलीय मजा॥
*
नको गं तो झोका
नको घालू खोपा ।
उगीच आठवत राहतो
माहेरघरचा सोपा॥
*
काळ बदलला तशा
आम्हीही बदललो ।
त्या जीवनशैलीला
आम्ही दुरावलो।
*
हौस आहे आम्हाला
वेळ नाही गवसत ।
आवडत असलं तरी
नाही काहीच जमत॥
*
मनाच्या तळकोपऱ्यात
जरी आहे सारं जपलेलं ।
तरी काळापुढे धावणारं
आहे जग बदललेलं ।
*
त्यापेक्षा तूच किनई
जरा बदल स्वतःला ।
घराबाहेर पड अन् जा
सहलीला देशाटनाला॥
*
मुक्त हो स्वच्छंद हो
घे आनंद जीवनाचा ।
येतो सावरता तुला तोल
नव्या आणि जुन्याचा॥
*
अगं! नको होऊ नाराज
काढीन बरं मी वेळ ।
तुझ्यासारखाच घालीन
नव्याजुन्याचा मेळ॥
*
आपले मोलाचे संस्कार
मी नाही बरं विसरणार ।
जमेल तसा तो वारसा
पुढे पुढे मी नेणार॥
☆
कवयित्री:सौ. नंदिनी देव
प्रस्तुती : डॉ. ज्योती गोडबोले
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
