सौ. प्रज्ञा गाडेकर
वाचताना वेचलेले
एक दिवस असाही… – कवी : श्री शिरीष मोराणकर ☆ प्रस्तुती – सौ. प्रज्ञा गाडेकर
*
एक दिवस असाही
उनाड होऊन उजाडावा
सकाळ दुपार संध्याकाळचा
कुठलाच मेळ नसावा
*
घड्याळाच्या गजराचीही
कट्टी तेव्हा असावी
कितीही वाजले तरी
चादरीची घडी नसावी
*
तास मिनीट सेकंदाशी
कुठलाही मेळ नसावा
उगवणारा प्रत्येक क्षण
आळसावलेलाच असावा
*
घरभर सारा पसारा
मस्तपैकी पसरावा
घडीविनाच वाचलेला
पेपर समोर असावा
*
स्नानाआधीच पदयात्रा
कोपऱ्यापर्यंत घडावी
झणझणीत मिसळ
येताना उदरी रिचवावी
*
न कळवताच ऑफीसला
सरळ दांडी मारावी
बाॅसच्या चेहऱ्यावर
खुश्शाल फुली मारावी
*
घरच्याच कपड्यांमधे मग
बाईकवरून भटकावं
गावाबाहेरच्या धाब्यावर
पोटभर हादडावं
*
जमलंच तर मित्रांसोबत
दोन घटका बसावं
एखादा रमीचा डाव टाकून
गप्पांमधे डुबकावं
*
रोजच्या सगळ्या चिंतांना
एक दिवस विसरावं
कानात वारा गेलेल्या वासरागत
हवं तसं हुंदडावं
*
रोजच्या आखीव रुटीनचं
रेखीव वळण विसरावं
एक दिवस उनाड होऊन
जगण्याचं टाॅनिक मिळवावं
☆
कवी: श्री शिरीष मोराणकर
प्रस्तुती: सौ. प्रज्ञा गाडेकर
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
