उषा नाईक
📖 वाचताना वेचलेले 📖
☆ इतके मला पुरे आहे… कवी : अज्ञात ☆ प्रस्तुती : उषा नाईक ☆
☆
बसायला आरामखुर्ची आहे,
हातामध्ये पुस्तक आहे,
डोळ्यांवर चष्मा आहे,
इतके मला पुरे आहे. ।।१।।
*
निसर्गामध्ये सौंदर्य आहे,
निळे आकाश, हिरवी झाडी आहे,
सूर्योदय, पाऊस, इंद्रधनुष्य आहे,
इतके मला पुरे आहे. ।।२।।
*
जगामध्ये संगीत आहे,
स्वरांचे कलाकार आहेत,
कानांना सुरांची जाण आहे,
इतके मला पुरे आहे. ।।३।।
*
बागांमध्ये फुले आहेत,
फुलांना सुवास आहे,
तो घ्यायला श्वास आहे,
इतके मला पुरे आहे. ।।४।।
*
साधे, चवदार जेवण आहे,
सुमधुर फळे आहेत,
ती चाखायला रसना आहे,
इतके मला पुरे आहे. ।।५।।
*
जवळचे मित्र आहेत,
मोबाईलवर संपर्कात आहेत,
कधीतरी भेटत असतात,
इतके मला पुरे आहे. ।।६।।
*
डोक्यावरती छत आहे,
कष्टाचे दोन पैसे आहेत,
दोन वेळचे दोन घास आहेत,
इतके मला पुरे आहे. ।।७।।
*
देहामध्ये प्राण आहे,
चालायला त्राण आहे,
शांत झोप लागत आहे,
इतके मला पुरे आहे. ।।८।।
*
याहून जास्त आपल्याला काय हवे आहे?
जगातील चांगले घेण्याचा,
आनंदी, आशावादी राहण्याचा,
विवेक हवा आहे!
इतके मला पुरे आहे. ।।९।।
*
विधात्याचे स्मरण आहे,
प्रार्थनेत मनःशांती आहे,
परमेश्वराची कृपा आहे,
इतके मला पुरे आहे. ।।१०।।
*
शरीर माझे योग्य साथ देत आहे,
स्मृतीची मला साथ आहे,
मी कुणावरही आज अवलंबून नाही — ही देवाची कृपा आहे,
इतके मला पुरे आहे!
इतकेच मला पुरे आहे! ||११||
☆
कवी – अज्ञात
प्रस्तुती : उषा नाईक
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
