श्री सुहास सोहोनी
वाचताना वेचलेले
☆ आई मला जरा आराम हवा आहे… – लेखक : अज्ञात ☆ प्रस्तुती – श्री सुहास सोहोनी ☆
शाळेत जाणारी मुलगी अभ्यास, शाळा, क्लास करून थकून आईला म्हणाली.
“अगं चांगला अभ्यास कर, नंतर आरामच करायचा आहे..”
मुलगी उठली, अभ्यासाला लागली आणि आराम करायचा राहून गेला.
“आई थोडा वेळ दे आरामाला, ऑफिसच्या कामातून थकून गेल्येय मी पार..”
“अगं लग्न करून सेटल हो एकदाची, मग आरामच करायचा आहे..”
मुलगी लग्नासाठी तयार झाली आणि आराम करायचा राहून गेला.
“अहो इतकी काय घाई आहे, एखादा वर्ष थांबू ना जरा..”
“अगं मुलं होऊन गेली वेळेवर की टेन्शन नाही, नंतर आरामच करायचा आहे..”
मुलगी आई बनली आणि आराम करायचा राहून गेला..
“अगं तुलाच जागरण करावं लागेल, मला ऑफिस आहे उद्या..थोडेच दिवस फक्त. मुलं मोठी झाली की आरामच करायचा आहे..”
ती बाळासाठी रात्रभर जागी राहिली आणि आराम करायचा राहून गेला.
“अहो मुलं आता शाळेत जायला लागली, जरा निवांत बसू द्या की मला..”
“मुलांकडे नीट लक्ष दे, त्यांचा अभ्यास घे, नंतर आरामच करायचा आहे..”
ती मुलांचा प्रोजेक्ट करायला बसली आणि आराम करायचा राहून गेला..
“आता मुलं स्वतःच्या पायावर उभी राहिली, आता जरा निवांत झाले मी..”
“आता यांच्या लग्नाचं पाहावं लागेल. ती एक जबाबदारी पार पाडली की मग आरामच करायचा आहे..”
तिने कंबर कसून सगळा कार्यक्रम आटोपला आणि आराम करायचा राहून गेला..
“मुलं संसाराला लागली, आता मी आराम करणार..”
“अगं आपल्या सुधाला दिवस गेले आहेत ना. मुलीचं बाळंतपण माहेरी करायचंय असतं ना..”
मुलीचं बाळंतपण आवरलं आणि आराम करायचा राहून गेला..
“चला, ही पण जबाबदारी पार पडली, आता मात्र आराम.”
मुलांचंही लग्न झालं. घरात नातू आला.
“सासूबाई मला नोकरी परत जॉईन करायची आहे..अथर्वला सांभाळाल का?”
नातवाच्या मागे दमली आणि आराम करायचा राहून गेला..
“चला नातू मोठा झाला, आता सगळ्या जबाबदाऱ्या संपल्या.. आता मी आराम करणार..”
“अगं ऐकलंस कां, गुडघे दुखताय माझे, उठून उभं रहायला जमत नाही..Bp वाढलाय वाटतं, डायबिटीस पण आहे..डॉक्टरने वेळेवर पथ्यपाणी करायला सांगितलंय बरं का..”
नवऱ्याची सेवा करत करत उरलं सुरलं आयुष्य गेलं..आणि आराम करायचा राहूनच गेला..
एक दिवशी देवच आला खाली, आराम करायचाय ना तुला? तिने हात जोडले आणि देव तिला घेऊन गेला..अखेर तिला आराम मिळाला. चिरंतन आराम !!
सर्व स्त्रियांना समर्पित.
स्त्री दिनाच्या मनापासून शुभेच्छा…
लेखक : अज्ञात
संग्राहक – सुहास सोहोनी
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
