मराठी साहित्य – कवितेचा उत्सव ☆ येता श्रावण… + संपादकीय निवेदन – सौ. दीप्ती कुलकर्णी – अभिनंदन ☆ सम्पादक मंडळ ई-अभिव्यक्ति (मराठी) ☆

सूचना/Information

(साहित्यिक एवं सांस्कृतिक समाचार)

सौ. दीप्ती कुलकर्णी

🪻 अभिनंदन 🪻

नक्षत्रांचं देणं या काव्य मंचाने राज्यस्तरीय श्रावणी काव्यलेखन स्पर्धा आयोजित केली होती. या स्पर्धेत आपल्या समुहातील ज्येष्ठ साहित्यिका श्रीमती दीप्ती कुलकर्णी यांच्या ‘येता श्रावण‘ या कवितेस प्रथम क्रमांक प्राप्त झाला आहे. त्यांच्या या उज्वल यशाबद्दल ई अभिव्यक्ती परिवारातर्फे त्यांचे मन: पूर्वक अभिनंदन आणि पुढील लेखनासाठी शुभेच्छा !

आज त्यांची कविता “येता श्रावण…“, ‘कवितेचा उत्सव‘ या सदरात देत आहोत.

संपादक मंडळ

ई अभिव्यक्ती मराठी

☆ ☆ ☆ ☆ ☆

 कवितेचा उत्सव  

☆ येता श्रावण… ☆ सौ. दीप्ती कुलकर्णी ☆

(पुरस्कार प्राप्त कविता)

☆

येता श्रावण, पाउस आला,

थेंबातुनी प्रगटला

रिमझिम सरींना, घेऊनी आला, हर्ष मनी दाटला!

ऊन कोवळे, क्षणात धारा

लपंडाव चालला

पाहता-पाहता, बालचमुही,

मंत्रमुग्ध जाहला!

अवनीनेही, हिरवा शालु

अंगभरी ल्यायला

डोंगररानी, तरुवेलींवर, पाचुही प्रगटला!

लोभस, सुंदर, फुले उमलता

तरु साजे खुलला

गंधरुपानै, मोहीत करण्या,

नजराणा उमटला!

चातकासही, थेंबा घेऊनी,

जन्म नवा लाभला!

रिमझिम येता, जलधारांचा,

नाद ही झंकारला !

जलाशयाचा, तरुवेलींचा,

जीवनदाता ठरला!

नव अशांचा, नव स्वप्नांचा,

झुला जणु झुलला!

इंद्रधनुचा मोहक पट तो,

आकाशी पातला

बालचमुंसह, सर्वांसाठी, आनंददायी ठरला!

सणवारांना घेऊनी आला,

हिरवाई ने सजला

गोफ गुंफण्या, , खेळायाला

महिला वर्गही नटला !!