श्री अशोक श्रीपाद भांबुरे
अशोक भांबुरे जी यांची कविता अभिव्यक्ती # ३१९
☆ षड्रिपूंची होळी… ☆ श्री अशोक श्रीपाद भांबुरे ☆
☆
लाकडाची वाटतो हा देह मोळी
जाळणारच षड्रिपूंची आज होळी
*
अर्पिला नैवेद्य मी होळीस आणिक
माय माझी वाढते बघ तूप पोळी
*
डोस थोडा वाढवावा लागणारच
टाळता ही येत नाही रोज गोळी
*
राख फासत एकमेकाला उद्याला
गावभर फिरणार आहे मस्त टोळी
*
रंग होता लावण्याचा बेत माझा
अन् तिने तर घातलेली शुभ्र चोळी
*
हो तिलाही शौक आहे रंगण्याचा
शोधते संधी अशी ती नार भोळी
*
रंग इतका फेक माझ्यावर सख्या तू
त्याच रंगाने भरावी पूर्ण झोळी
☆
© अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
