मराठी साहित्य – कवितेचा उत्सव ☆ विजय साहित्य # २७४ – मिसळ पाव…! ☆ कविराज विजय यशवंत सातपुते ☆

कविराज विजय यशवंत सातपुते

कवितेचा उत्सव # २७४ – विजय साहित्य

☆ मिसळ पाव…! ☆

☆

मोड आलेल्या, मटकी संगे

रस भाजीचा, आस्वाद नवा

मसालेदार, झणझणीत 

पोटभरीचा, पदार्थ हवा.

* 

फरसाणाची, करा पेरणी

कोथींबीरीचा , हात सढळ

रस लिंबाचा, तर्री वरती

कांदा बारीक, मधे चपळ.

 *

मऊ पावाची, घेऊन जोडी

चला मारूया ,‌मजेत ताव

भूक लागता, रस्त्यावरती

चला खाऊया, “मिसळ पाव”.

 *

कोल्हापुरचा, झणका भारी

नाशिकातला, खासच स्वाद

खान्देशातला, खडा मसाला

मिसळींचा या ,चाखा आस्वाद.

 *

पोहे घालून, वाढे लज्जत

नगरी कींवा, असो पुणेरी

पदार्थ न्यारा,भूक वाढवी

कधी कुठेही, लावे हजेरी.

☆

© कविराज विजय यशवंत सातपुते

सहकारनगर नंबर दोन, दशभुजा गणपती रोड, पुणे.  411 009.