मराठी साहित्य – कवितेचा उत्सव ☆ विजय साहित्य # ३०० – जागा…! ☆ कविराज विजय यशवंत सातपुते ☆

कविराज विजय यशवंत सातपुते

कवितेचा उत्सव #३००  – विजय साहित्य

☆ जागा…! ☆ कविराज विजय यशवंत सातपुते ☆

विषय : माझा गाव

 (वृत्त : लवंगलता – मात्रा विभाग : ८-८-८-४ = २८)

☆

गावासंगे नाळ जोडली शिवार माझी आई

वेशीवरची, दाट बाभळी, आठवणींची शाई…!१

*

गावदेवता नव्या मंदिरी वाट पाहते जेव्हा

उरूस जत्रा, जमतो मेळा, माळावरती तेव्हा…!२

*

सहा ऋतूंचे, सहा सोहळे, पार वडाचा पाही

नदी किनारी,औदुंबर तो,‌ सवे‌ ऋतूंच्या राही…!३

*

घरे गावची, नटली थटली, शहरी वारा, प्याली

सुख सोयींनी, रमा पाहुणी, वाजत गाजत आली…!४

*

शाळा,रस्ते , ग्राम चावडी, कात टाकली वाटे

जुन्या नव्याची, ऊन सावली, उरात क्षणभर दाटे…!५

*

रूप बदलले मम गावाचे, नसे बदलली,माया

परस्परांच्या, दिठी मिठीला आतुर होते, काया…!६

*

जितराबाने, भरला गोठा, दुध दुभत्याने,चरवी

सणवाराला,आपुलकीने, भरून जाते पडवी…!७

*

अजून येतो, वास फुलांना, साद घालती वाटा

अजून येते,धावत कोणी, रूतता पाई काटा…!८

*

संस्कारांची, जुनाट वसने, गावकुसावर, मुरली

पाय धुळीच्या, पायघड्यांवर, माया ममता,उरली…!९

*

गाव घराचे,नवीन वासे, माणुसकीचा धागा

अजून ठेवली मम गावाने, हृदयामध्ये जागा…!१०

☆

© कविराज विजय यशवंत सातपुते

सहकारनगर नंबर दोन, दशभुजा गणपती रोड, पुणे.  411 009.