श्री अशोक श्रीपाद भांबुरे
अशोक भांबुरे जी यांची कविता अभिव्यक्ती # ३३९
☆ झाडतो पायरी… ☆ श्री अशोक श्रीपाद भांबुरे ☆
☆
नाही सोडून वागलो, माझी जाणतो पायरी
आधी खायचो हापूस, आता मागतो पायरी
*
पायरीच्या दगडामधे, होय भक्ती साठलेली
अनवाणी पायाने मी, पुढची चालतो पायरी
*
लाज वाटावी कशाला, मला देवाच्या दारात
जातो देवळात तेव्हा, तेथे झाडतो पायरी
*
छोट्या जागेत बंगला, झाल्या उंच या पायऱ्या,
मोठ्या कष्टाने तरिही, मी ही लांघतो पायरी
*
माणसाची जात आहे, राग येतो केव्हा तरी
तेव्हा काही काळ तरी, मीही सोडतो पायरी
*
आहे सत्तरी गाठली, थके पायाचा पाळणा
वाटे काळजी स्वतःची, तेव्हा टाळतो पायरी
*
पुढे जायची बाळाला, आता आगलेली ओढ
बाळराजाला उत्साह, तोही रांगतो पायरी
☆
© अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
