प्रभा सोनवणे
कवितेच्या प्रदेशात # ३२७
☆ पाऊस… ☆ प्रभा सोनवणे ☆
☆
खिडकीतून बाहेरचा पाऊस पहाताना,
पुन्हा आठवले ते झिम्माड दिवस ,
शाळेतले!
आणि ती रंगीबेरंगी छत्री—
छोटी पावलं..लाल बूट!
त्या त्या वयातला पाऊस !!
सत्तर पावसाळे पाहिल्यानंतरही…
पाऊस तरूणच!
आपण म्हातारे होत जातो….
म्हणूनच खिडकीतून दिसणारा
पाऊस….
शिंपडून घेतला आत्ताच मनावर!
किती ताजं टवटवीत झालं मन!
छोटी छत्री डोक्यावर घेऊन,
पावसाच्या पाण्यात सोडलेल्या–
कागदी नावेसारखं !!!
☆
© प्रभा सोनवणे
संपर्क – “सोनवणे हाऊस”, ३४८ सोमवार
पेठ, पंधरा ऑगस्ट चौक, विश्वेश्वर बँकेसमोर, पुणे 411011
मोबाईल-९२७०७२९५०३, email- sonawane.prabha@gmail.com
≈संस्थापक संपादक – श्री हेमन्त बावनकर/सम्पादक मंडळ (मराठी) – उज्ज्वला केळकर/श्री सुहास रघुनाथ पंडित / मंजुषा मुळे/ गौरी गाडेकर≈
