सौ. गौरी गाडेकर
वाचताना वेचलेले
☆ सोनं… – लेखक : अज्ञात ☆ प्रस्तुती – सौ. गौरी गाडेकर ☆
☆
काल जे सोनं होतं
ते आज कचरा झालं
दसरा संपला अन्
महत्त्व त्याचं विरून गेलं||१||
अरेच्चा! कालच तर सोनं म्हणून
देवाचरणी वाहिलं होतं,
सोनं घ्या, सोन्यासारखं रहा
एकमेकांस म्हटलं होतं||२||
कळलंच नाही मला,
असं काय झालं,
हे कालच सोनं
आज कचरा कसं झालं? ||३||
आपट्यांच्या पानापानांसारखं
आपणही असतो
कोणाच्या तरी गरजेच्या वेळी
आपण त्याचं सोनं होतो,
त्याची गरज संपली की मात्र
आपणही बाहेर काढले जातो,
दसऱ्याच्या सोन्यासारखं
आपणही कचरा होतो||४||
कचरा झालाय आज म्हणून,
आपट्याच्या झाडानं हार मानली नाही,
पुढच्या वर्षी परत दसरा येणार आहे,
म्हणून पठ्ठ्यानं बहरणं सोडलं नाही ||५||
मग आपण तर माणसं आहोत,
कोणी कचरा समजलं म्हणून खचून जायचं नसतं,
कोणाची तरी मदत करून
परत सोनं व्हायचं असतं,
आपण बावनकशी सोनंच आहोत,
हे कदापि विसरायचं नसतं ||६||
☆
लेखक: अज्ञात
प्रस्तुती: सौ. गौरी गाडेकr
संपर्क – 1/602, कैरव, जी. ई. लिंक्स, राम मंदिर रोड, गोरेगाव (पश्चिम), मुंबई 400104.
फोन नं. 9820206306
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
