श्री सुनीत मुळे
वाचताना वेचलेले
☆ स्वच्छंद जगण्यासाठी वयाची मर्यादा नसते… कवी : अज्ञात ☆ प्रस्तुती – श्री सुनीत मुळे ☆
☆
अहो, संपत आलेल्या चिवड्यात देखील मीठ जास्तच असते,
साठीत काय आणि सत्तरीत काय? माणसाने माणसासारखेच जगायचं असते.
स्वछंद जगण्यासाठी, वयाची मर्यादा नसते,
अहो, संपत आलेल्या चिवड्यात देखील मीठ जास्तच असते || ध्रु ||
*
मॅच्युरिटीच्या नावाखाली आपण करतो मिश्किल स्वभावाचा त्याग,
आतल्या आत झुरत राहते, ह्या विरहाची आग
केवळ लोकलज्जेखातर मनातली इच्छा मारायची नसते,
अहो, संपत आलेल्या चिवड्यात देखील मीठ जास्तच असते || १ ||
*
मनसोक्त हसणारा तू,
आज फक्त गालातल्या गालातच हसतोस,
सुरांच्या मैफिलीत बसणारा तू
आज फक्त घरातच गुणगुणत बसतोस,
मनात वळवळणाऱ्या किड्यांची वळवळ
कोणाकरिता थांबवायची नसते,
अहो, संपत आलेल्या चिवड्यात देखील मीठ जास्तच असते || २ ||
*
परफेक्षनिस्ट होण्याच्या हव्यासापायी
आपण फारच व्यस्त असतो,
छोट्या-छोट्या सुखांकडेही दुर्लक्ष करून बसतो,
चुका न होण्याची खात्री कुठल्याच वयात नसते,
अहो, संपत आलेल्या चिवड्यात देखील मीठ जास्तच असते || ३ ||
*
दादा, मामा, बाबा, आबा, असा चढत्या नात्यांचा आलेख
चाळिशीत हे शोभते का? साठीत असे वागावे का?
होतो अशा वाक्यांचा उल्लेख
वयाच्या आणि नात्यांच्या बंधनात फार अडकायचे नसते,
अहो, संपत आलेल्या चिवड्यात देखील मीठ जास्तच असते || ४ ||
*
व्यावहारिक जीवनाच्या साचेबद्ध चौकटीतच आपण फसतो,
दुसऱ्याच्या चष्म्यातून बघता-बघता, आपण आपलीच दृष्टी हरवून बसतो,
आपल्या जगण्याची दिशा दुसऱ्याच्या सांगण्यावरून ठरवायची नसते,
अहो, संपत आलेल्या चिवड्यात देखील मीठ जास्तच असते || ५ ||
*
एकदा अनुभवा तरी हे जग चौकटीच्या बाहेरून,
बिनधास्त जगा सर्व बंधन मर्यादा झुगारून,
मानवी देह मिळण्याची खात्री प्रत्येक जन्मात नसते,
अहो, संपत आलेल्या चिवड्यात देखील मीठ जास्तच असते || ६ ||
☆
कवी: अज्ञात
प्रस्तुती – श्री सुनीत मुळे
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
