सौ. मंजुषा सुनीत मुळे
📚 वाचताना वेचलेले 📖
☆ “फराळ…” – कवयित्री: श्रीमती सुषमा नांदुर्डीकर ☆ प्रस्तुती – सौ. मंजुषा सुनीत मुळे ☆
☆
ह्यावर्षी ठरवलं
फराळाची बाहेर ऑर्डरच देऊ
नको ते गुढग्यांचे कुरकुरणे
नको खांद्याचे दुखणे
आणि नकोच ते घामाने निथाळणे
ह्या दिवाळीला अगदी फ्रेश राहू
स्वतःकडे जरा लक्ष देऊ.
*
तेवढ्यात मुलाने काढले फर्मान
आई चिवडा सोडून सगळं बाहेरून आण
म्हटलं, पटकन चिवडा करू
बाकी मात्र बाहेरूनच आणू
*
तेवढ्यात नातू लाडाने म्हणाला
ए आजी, तुझे बेसन लाडू वर्ल्डमधे बेस्ट
कशी सांगू त्याला अरे माझी दुखतेय वेस्ट
म्हटलं ठीक आहे. लाडू तेवढे करू
बाकी मात्र बाहेरूनच आणू
*
तेवढ्यात नात जवळ आली
तुझीच शंकरपाळी आवडतात, म्हणाली
शंकरपाळ्यांची तयारी केली सुरू
दुधावरच्या सायीला कसं नाराज करू
मनात म्हटलं बाकी सगळं मात्र बाहेरूनच आणू
*
तेवढ्यात सूनबाई म्हणाली
आई लक्ष्मीपूजनाला करंजीची
तुम्हीच तर सवय लावली
मग काय लागले करंजीच्या तयारीला
घरच्या लक्ष्मीला नाराज करणे परवडेल का मला?
*
शेवटी सगळा फराळ करून झाला
सूनबाईनेही मला खूश करण्याचा चंग बांधला
माझ्यासाठी बॉडी मसाज बूक केला
आणि बघता बघता माझा थकवा दूर पळाला
*
पण खरं सांगू का तुम्हाला
फराळाचे भरलेले डबे बघून मीही झाले तृप्त
आता तुम्हीच सांगा मला
आईला होता येईल का हो कधी अलिप्त?
☆
कवयित्री: श्रीमती सुषमा नांदुर्डीकर
प्रस्तुती : सौ. मंजुषा सुनीत मुळे
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
