सुश्री मंजुषा सुनीत मुळे
वाचताना वेचलेले
☆ दिदी ssss… (कविता)….प्रमोद जोशी ☆ प्रस्तुती – सुश्री मंजुषा सुनीत मुळे ☆
अशोकाच्या वाटेवर,
कुणी पसरला शोक?
टोचे देठानाच आता,
पाकळ्यांचे तीक्ष्ण टोक!
तुझे जाणे ना सामान्य,
आनंदाचा हा युगांत!
संवादिनीला असह्य,
तिच्या भात्याचा आकांत!
मंगेशाच्या मंदिरात,
देई हुंदका ओंकार!
घंटा बडवूनसुद्धा,
तिचा गोठला झंकार!
कुणी कुणाचे सांत्वन,
आता करायाचे सांग?
आसवांच्या पाठीमागे,
उभी हुंदक्यांची रांग!
कोणताही भाव नाही,
तुझ्या गाण्यातून वर्ज!
पिढ्यापिढ्याना हवेसे,
तुझे सप्तसुरी कर्ज!
दुस्वासाने “लता” शब्द,
उलटाही केला तरी!
तोही “ताल होतो आणि,
येई संगिताच्या घरी!
भैरवीचा फुटे बांध,
हमसून रडे नांदी!
साती स्वर वेडेपिसे,
शोधतात त्यांची दिदी!
मंगेशीच्या गाभाऱ्यात,
ज्योत स्फुंदे समईत!
अभिषेकही तुटक,
धार विसरली रीत!
वाट पाही दिनानाथ,
त्यांच्या लेकीची स्वर्गात!
तीही चालली तृप्तीत,
अलौकिक स्वर गात!
आज क्षितिजावरती,
सूर्य उगवला नाही!
गेल्या तमात बुडून,
आंधळ्याच दिशा दाही!
-प्रमोद जोशी, देवगड.
9423513604
संग्राहक – मंजुषा सुनीत मुळे
९८२२८४६७६२
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈
