स्वप्ना मुळे (मायी)
जीवनरंग
☆ थिंक पॉझिटिव्ह… ☆ स्वप्ना मुळे (मायी) ☆
उशीर झाला म्हणून जीजा लगबगीने आत शिरली,.. बाहेरच्या उकड्यातून ह्या एसी खोलीत शिरल की जीव कसा गारेगार होऊन जातो ना अस मनात म्हणत ओढणी खोचून चपला रॅकमध्ये चढवून,.. हळूच नकली असून अगदी खऱ्याखुऱ्या वाटणाऱ्या फुलांना तिने लहान मुलीसारखा हात लावला त्या वेलवेट फुलांच तिला उगाच आकर्षण वाटायचं,.. त्याचवेळी तिच्याकडे पाहात पार्लरवालीने उगाच घसा खाकरला,.. तशी जरा घाबरत दबकत ती आत छोट्याशा किचनकडे पळाली,.. टू बी एच के मध्ये आलिशान सजवलेलं हे पार्लर,.. अगदी राजवाड्या सारखंच वाटायचं तिला,.. मोठे मोठे आरसे, चकचकीत भिंती,.. फुलांच्या सुंदर आरास,.. शाही फर्निचर,.. सगळी सुगंधी सौंदर्य प्रसाधन,.. आणि इथे येणाऱ्या बायका त्याही तेवढ्याच सुंदर अगदी राणी सारख्या आणि इथून जाताना तर अगदी महाराणी दिसायच्या,.. तुकतुकीत अंग दिसायचं त्यांचं,.. चमकणारे हात, ओठ आणि सळसळणारे केस,.. ती सुंदर आकर्षक नखं,.. सतत यायच्या अश्या राण्या इथे,.. आपली मालकीण अगदी गोड बोलत हसत त्यांना मस्त, मालिश, केसांच्या स्टाईल, कधी कोरीव भुवया,.. कधी तर पायांना मस्त घासून गोरपान करून द्यायची,… आधी या कशाची माहिती नव्हती आपल्याला,.. लग्नात काय ते बाजूच्या सुमिने बळजबरी तोंडाला काहीतरी लावून दिलं पण त्या लेपाच्या सुगंधाने मनात काय शहारे उठले होते आपल्या,.. इथ तर पायाच्या नखापासून डोक्याच्या केसापर्यंत सगळे महागडे क्रीम लावून ह्या बायका नुसत्या सुगंधी होऊन जातात,.. बायका तर बायका लहान सहान पोरी देखील काय काय करून घेतात ग बाई,.. पण मलाही फार वाटत पर्समध्ये एक गड्डी घ्यावी इथे मॅडमच्या टेबलवर टाकावी आणि म्हणावं फुल बॉडी राणीवाणी करून दे,… आणि माझी अशी सगळी सेवा केल्यावर,.. मॅडमनी किंवा तू,.. मी रोज जशी सगळ्यांना कॉफी देते तशी मला कॉफी आणून द्यावी,.. मी पण मग स्वतःला आरश्यात निरखत कॉफिचे एक एक घोट घ्यावे,.. तिच्या वाक्यावर हसत तिच्या सोबत काम करणाऱ्या शमीने तिला डोक्यात एक टपली मारली,.. “ए वेडे पटापट कप बाहेर नेऊन दे आधीच तुला यायला उशीर झाल्याने मॅडम चिडलेली आहे,.. आणि तू मॅडमनी किंवा मी तुला कॉफी द्यायचे स्वप्न बघतेस होय,.. तिने ऐकल तर काढून टाकेल नोकरीवरून,.. “
शमीच्या वाक्यावर जिजा म्हणाली,.. अग स्वप्न बघायला,.. मोठा विचार करायला काय पैसे लागतात व्हय,.. फुकट आहे तर बघू दे की,.. अन् माझा नवरा म्हणतो,.. असं छान आयुष्य बघत राहायचं,.. त्याला काय म्हणतात बघ आपल्या मॅडम पण सांगतात ना आपल्याला नेहमी,.. थिंक पॉझिटिव्ह,.. तस ग,.. झालं स्वप्न पूर्ण तर झालं नाहीतर तो बघण्याचा आनंद तर मिळतो ना,..
त्यावर चिडून शमी म्हणाली, “आता जातेस का,.. सांगू मॅडमला,.. “तशी जीजा म्हणाली,.. “हो ग बाई जाते. ” म्हणत जीजा कॉफीचे कप घेऊन बाहेर पळाली,..
चार जणींचे वेगवेगळे पार्लर सुरू होते,.. कुणाची हेअर स्टाईल, कुणाची फेस मसाज,.. कुणाचं व्हाक्सिंग आणि कुणाचा मेकअप,.. जीजाने कॉफीचे कप प्रत्येकीला दिले आणि निघाली तेवढ्यात मॅडम म्हणाली, “जीजा जरा इथे मेकअप करताना हे पकड आज ती चिंगी आली नाही त्यामुळे माझी धावपळ होत आहे,.. “मॅडमची अज्ञा ऐकवीच लागली,.. जीजा तिथेच उभी राहिली,.. ती मॅडमची मैत्रीण होती हे जीजाला माहित होत,.. ती मैत्रीण मॅडमला म्हणत होती,.. “जरा फेअर टोन घे माझ्या नवऱ्याला माझ्या काळया रंगाची फार लाज वाटते,.. कारण आज अगदी फॉरेनर येणार आहेत आमच्याकडे. “
समोरची बाई चांगली गव्हाळ गोरी होतीच की अगदी आपल्यासारखी काळी नव्हती तरी तिचा नवरा असा म्हणतो म्हणजे नक्की आंधळा असेल अस उगाच जीजाच्या मनात आलं,..
तेवढ्यात त्या मैत्रिणीला फोन आला,.. तो फोन जीजाने तिच्या कानाशी लावला कारण तिचे हात नेलपेंट लावलेले होते,.. ती फोनवर बोलत होती आणि ती एकदम ओरडलीच,.. “काय,.. अग असं कस तू वेळेवर सांगतेस,.. घरची पार्टी मोठी आहे,.. तू कोणाला तरी ऍडजस्ट कर पण ये ग बाई,.. नाही जमत शीट ठेव फोन,.. एवढं बोलत फोन बाजूला करण्याचा तिने जीजाला इशारा केला,.. आणि ती एकदम पार्लरमॅडमलाच म्हणाली,.. “मधु मला मदत हवी आहे तुझी,.. प्लीज मला काही काळासाठी तुझी जीजा दे ना,.. पैसे तुला देते आणि तिलाही,.. पण अगदी गरज आहे ग आज”
मॅडम म्हणाली, “आधी जरा सांगशील नेमक काय काम आहे आणि काय झालं,.. ?त्यावर ती मैत्रीण म्हणाली, “माझ्या नवऱ्याचे फॉरेन क्लायंट येणार आहेत,.. तिघी लेडी आहेत,.. त्यांना दोन तास आमच्या घरी घालवायचे आहेत,.. पण काही पर्सनल गोष्टी असल्याने,.. इंग्रजी न येणारी पण स्मार्ट अशी कामवाली त्यांच्या फक्त अवती भवती हवी आहे आणि मी ठरवलेली कामवाली तिच्या मुलीला अपघात झाला म्हणून ती आता नाही म्हणते,.. आता माझ्याकडे वेळ पण नाही इथूनच मी आता त्यांना घ्यायला विमानतळावर जाणार होते,.. तुला म्हंटले होते ना आणखी एक जणीच पार्लर करून द्यायचे आहे,.. तिला आपण अर्ध्यातासाने बोलवले होते,.. तीच आता नाही म्हणते,.. मधु प्लीज हिला समजवून सांग आणि पाठव दोन तास,.. प्लीज.. “
जीजा ऐकत होती पण जरा घाबरली होती,.. पण मॅडम पुढे काही चालणार नाही हे ही जीजाला माहित होत,.. मॅडमने तिला बाजूला घेतलं आणि समजावल मध्येच ती मैत्रीण खुर्चीवरून उठून जीजाकडे येत म्हणाली, “नाही म्हणू नकोस प्लीज ग,.. आता वेळेवर बाई मिळणार नाही मला,.. मी तुला दोन तासांचे दोन हजार रुपये देईल ग,.. “जीजाने मॅडम कडे बघितलं,.. मॅडम म्हणाल्या, “जा माझी विश्वासाची मैत्रीण आहे,.. “जीजा म्हणाली, “पण ते चहा, कॉफी द्यायचं,.. कोण बघेल,.. “मॅडम हसत म्हणाली, “करेल आज शमी ऍडजस्ट आणि मी आहे मदतीला तू आता पटकन खुर्चीत बस.. म्हणत मॅडमने तिच्याकडे पार्लर गाऊन फेकला,.. तो घालताना जीजा लाजली,.. तिला रोज बायकांना अश्या गाऊन मध्ये बघून लाज वाटायची,.. तिने पडद्याआड जाऊन गाऊन घातला आणि ती त्या सिंहासनासारख्या खुर्चीत रेलली,.. मॅडम तिच्या मैत्रिणीला म्हणाल्या, “फेशियल आणि मेकअप करते,.. त्यावर,.. “मैत्रीण म्हणाली, “हे बघ एकदमच vip गेस्ट आहेत त्या फॉरेनर,.. अगदीच स्मार्ट वाटली पाहिजे,.. ड्रेस तर आहेच बॅगमध्ये पण ते हात, पाय सगळच क्लीन करून घे अजून चार तास आहेत ना आपल्याकडे,..
जीजा मघाच आपल स्वप्न पूर्ण झाल म्हणून आनंदली होती आणि मनातून घाबरली देखील होती,.. दोन तास तसे अवघड जाणार होते,.. ती ह्या विचारात डोळे बंद करून बसली होती आणि तेवढ्यात मॅडमचे गार, मऊ हात तिच्या चेहऱ्यावर फिरायला लागले,.. तो क्रिमचा सुगंध,.. तिला अगदी स्वप्नातल्या परीसारखं वाटायला लागलं,.. तिने हळूच डोळे उघडुन आरश्यात बघण्याचा प्रयत्न केला,.. ती जरा लाजली,.. उघडे पडलेले खांदे,.. तो चमकणारा चेहरा,.. मॅडमने मसाज करताना चेहऱ्यावर प्रेमाने केलेले स्पर्श,.. सगळ सगळ अगदी स्वप्नवत,.. मॅडम मध्येच दुसऱ्या खोलीत गेल्या मस्त गाणी सुरू होती आणि खोलीत मंद प्रकाश,.. जीजाला आवडणारच गाणं सुरू होत,.. “आज मैं उपर आस्मा नीचे,.. “
गाण्याच्या मध्येच तिला हाक आली,.. “कॉफी घ्या बाईसाहेब,.. ए तुझ थिंक पॉझिटिव्ह तर काम करून गेलं ग,.. ” जीजा शमीला बघून एकदम गळ्यात पडत म्हणाली,.. “खरच ना काय मज्जा असते ग हे सगळ सुख आ हा हा,… शमे मला पैसे मिळणार ना त्यातून तुझ क्लीनप तरी माझ्याकडुन करून घेऊ उद्या आपण,.. आणि मी तुला कॉफी घेऊन येईल बघ तुला पण कळेल हे सुख,.. शमीला आपल्या ह्या मैत्रिणीच कौतुक वाटल,.. ही आपला पण विचार करते,.. शमी तिच्या गळ्यात पडली आणि म्हणाली तू मनाने सुंदर आहेस म्हणून आता आणखी सुंदर दिसशील,.. कारण मी इथे गेल्या कित्येक वर्षापासून काम करते,.. इथे आलेल्या सगळ्याच बायका सुंदर होऊन जातात अस नाही,… कारण आपण चहा, कॉफी देताना बघतो ना,.. ज्या सगळ्यांना प्रेमाने वागणूक देतात, आपली श्रीमंती मिरवत नाही त्या जास्तच सुंदर दिसतात ना,.. तशी तू आता सगळ्यात सुंदर दिसत आहेस.
जीजा म्हणाली, “हे सगळ ठीक आहे ग, पण आता पुढे कठीण आहे,.. ही सगळी आपली हौस होती ग पण आता हे मेकअपचं बेगडीपण मिरवता येईल का.. ?मला त्याची सवय नाही ना,.. शमी म्हणाली, “आपण काही वेगळ केलं आहे ह्याची जाणीवच नको ठेवुस अगदी प्रामाणिक आणि सहजपणे वावरलीस की सोपं जाईल सगळ,.. जीजाने स्वतःच रूप आरश्यात न्यहाळत कॉफी घेतली,.. शमिला आज जास्तच काम पडलं हे मात्र तिला मनोमन जाणवत होत,..
वेळ भरभर पुढे गेली आणि पार्लर मधून बाहेर पडताना जीजा अगदी जोजो दिसायला लागली,.. सावळी असली तरी सगळी त्वचा तुकतुकीत दिसत होती,.. केसांना वॉश करून केलेली हेअर स्टाईल, मेकअप सगळ जीजाच रूप पालटून टाकणार होत,. आणि विशेष म्हणजे तो फ्रॉक अगदी मस्त वेलवेटचा,.. त्या कोपऱ्यातल्या फुलांसारखा ज्याच्या स्पर्शाने जीजा आनंदून जायची,.. आज तर अगदी तसा ड्रेस अंगभर गुदगुल्या करत होता,.. मॅडमनी जीजाला जवळ घेतल,.. तुला चार चौघात वावरता येतं तेवढी तू हुशार आहेस म्हणून मी ही जबाबदारी घेऊ दिली आहे तुला,.. जा नीट काम कर,.. जीजा मॅडमच्या गळ्यातच पडली,.. गावाकडे नवीन लग्न झालेलं हे जोडपं निव्वळ वेळ घालवत आयुष्य जगत होत म्हणून मॅडमने सहा महिन्यापूर्वी जीजा आणि तिच्या नवऱ्याला इथे आणल होत,.. त्याला कंपनीत कामाला लावून दिलं आणि जीजाला इथे आणल,.. पण अगदी चालण्या बोलण्या पासुन सगळ त्यांनी जीजाला शिकवल होत,.. कितीतरी नवे शब्द जीजा शिकली होती,.. कोणी म्हणणार देखील नाही की खेड्यात रिकामी हिंडणारी ही पोरगी असेल,.. इतकं चंट आणि चटपटीत त्यांनी तिला केलं होत,.. खरतर पुढे शिक्षण देऊन तिला चांगली नोकरी लावावी अस मॅडमला वाटत होत,.. जीजा सासरी पैसे पाठवते त्यांना पैसे पुरत नाहीत तरी कुठली तक्रार न करता अगदी उत्साहाने फिरणारी ही जीजा मॅडमची लाडकी होती,.. ती मैत्रिणीच्या गाडीत बसून गेली आणि मॅडम शमीला म्हणाल्या, “हुशार आहे पण नशीब घेऊन नाही आली,.. “त्यावर शमी म्हणाली, “स्वप्न मात्र घेऊन आली आहे ती,.. मॅडम तुम्ही आम्हाला जे थिंक पॉझिटिव्ह शिकवता ते ती पक्क डोक्यात ठेवते,.. कदाचित म्हणून आज तिचं छोटं स्वप्न पूर्ण झालं,.. “
चार तासांनी जीजा आलीच अगदी हवेवर स्वार होऊन,.. ती ते दोन तास जिंकून आली,.. सोबत पैसे, तो अनुभव ती खुश होती,.. पार्लर मध्ये आल्यावर तिने आपला जुना ड्रेस घातला,.. मॅडमला नमस्कार केला,.. मॅडम म्हणाल्या, “जीजा तो मेकअप काढून देते चेहऱ्यावरचा,.. तर जीजा म्हणाली, “नको मॅडम आज माझ्या राजाला ही राणी अशी वेगळी बघू द्या की,… पण,.. एक सांगू मॅडम असं चकचकीत तोंड केलं की भीती असते हो आतले आपण हरवून जाऊ की काय,.. “यावर मॅडम हसून म्हणाल्या, “जीजा अग, असे तर किती तरी प्रसंग असतात की ते आपल्याला हरवू पाहतात नुसता तोंडावर मेकअप लावल्याने अस होइल अस नाही ग,.. आयुष्य जगताना कितीदा तरी तुम्ही हरू शकता, बदलू शकता,.. तेंव्हा एक लक्षात ठेवायचं जीजा,.. थिंक पॉझिटिव्ह,.. जे होईल ते चांगल्यासाठीच ते होईलच,.. “
तेवढ्यात शमी कॉफी घेऊन आली,.. पार्लर बंद करण्याची वेळ होती,.. तीन कप कॉफीचे एकमेकावर किंणकिणले थिंक पॉझिटिव्ह.. “
© स्वप्ना मुळे (मायी)
फक्त व्हाट्सअप संपर्क +91 93252 63233
छत्रपति संभाजी नगर महाराष्ट्र
≈संस्थापक् संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
