श्री हरिश्चंद्र कोठावदे
कवितेचा उत्सव
☆ विरून गेला पट सतरंगी… ☆ श्री हरिश्चंद्र कोठावदे ☆
(वृत्त : पादाकुलक)
विरून गेला पट सतरंगी
सरले गारुड ऋतुगंधांचे
कळले नाही कधी आटले
कढ व्याकुळही घनांतरीचे !
मंद जाहले गगनदीपही
दंतकथा जणु टिपुर चांदणे
वठली झाडे , पसार पक्षी
सुने सुने वन उदासवाणे !
गवतावरले थेंब दवाचे
अता न हळवे पूर्वीइतुके
पूर ओसरे गडद धुक्याचा
पुनश्च डोंगर होत बोडके !
कधीकाळच्या निळ्या नभाची
थंड तिह्राइत साद दादही
फडफड थोडी व्याकुळ पंखी
सरता सरता सरेल तीही !
© श्री हरिश्चंद्र कोठावदे
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
