श्री सुजित कदम
कवितेचा उत्सव
☆ सुजित साहित्य # 181 ☆ संत परिसा भागवत…!! ☆ श्री सुजित कदम ☆
संत परिसा लाभला
आद्य शिष्याचा रे मान
पंढरीत सांगतसे
कथा भागवत छान…! १
संत नामदेवांचा हा
पट्टशिष्य अनुयायी
भक्ती शक्ती गुरुभाव
पदोपदी याचे ठायीं…! २
ब्राम्हण्याचा अहंकार
नामदेवे निर्दाळीला
निजबोध करूनिया
संत परीस जाणीला…! ३
दिला वर रक्मिणीने
चित्त भजनात दंग
वैचारिक प्रगल्भता
रामकृष्ण सरि संग..! ४
वेद उपनिषदांचा
होता अभ्यास सखोल
संत श्रेष्ठ विचारांचा
अभंगात होता बोल…! ५
विविधांगी व्यक्तीमत्व
वेद विद्या पारंगत
स्तूती महात्म्य गौरव
सांगतसे भागवत….! ६
होता परीस अमोल
दैवी कृपे लाभलेला
नामदेव राजाईने
चंद्रभागे फेकलेला…! ७
संत परीसाचा हट्ट
नामदेवे पुरविला
ओंजळीत दगडांचा
रत्न साठा दडविला…! ८
लंका दर्शनाची कथा
केला दूर अहंकार
नामदेव परीसाचा
निरूपणी साक्षात्कार….! ९
नाना धर्म ग्रंथातून
शिष्योत्तम आकारिला
भक्तीभाव अध्यात्मात
ब्रह्म सुखे साकारीला..! १०
संत सकल गाथेत
आहे संवादी अभंग
नामदेव विचारांना
आहे परीसाचा ढंग..! ११
नामदेव कृतज्ञता
भावोत्कट चेतोहारी
संत परीसाचे काव्य
प्रासादिक शब्द वारी..! १२
© श्री सुजित कदम
संपर्क – 117, विठ्ठलवाडी जकात नाका, सिंहगढ़ रोड,पुणे 30
मो. 7276282626
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
