सुश्री प्रभा सोनवणे
कवितेच्या प्रदेशात # 229
☆ मृदगंध ☆ सुश्री प्रभा सोनवणे ☆
☆
पुढच्याच महिन्यात पाऊस येईल,
मृगाचा!
जून मधला पाऊस मला खरा वाटतो,
तुझ्यासारखा!
दरवर्षी नवा !
— कोऱ्या पाठ्यपुस्तकांसारखा!!
त्या कोऱ्या पुस्तकांचा वास
आणि मृदगंध!
कुठल्याही सुवासिक फुलाला किंवा
महागड्या अत्तरालाही,
नाहीच त्याची सर !
नेमेचि येतो…..म्हणण्या सारखा,
नाही राहिला पाऊस!
तो ही आता बेभरवशाचा!
पण आठवणी नेहमीच
असतात भरोश्याच्या…शाश्वत!
मला जून मधला पाऊस,
जुन्या आठवणींच्या गावात घेऊन जातो !
ती शाळा..भिजलेली वाट…
वर्ग…खिडकी ..पाऊसधारा!
आपलं गाव दुष्काळी,
पण पाऊस नेहमीच असतो,
सुजलाम सुफलाम!
वैशाख वणव्यात तापलेल्या
धरणीला तृप्त करताना,
दरवळणारा मृदगंध—
थेट प्राणात जाऊन पोहचलेला,
आणि सखे तू ही तशीच !
म्हणायचीस,
“जिवंतपणी तर मी तुला विसरूच शकत नाही पण,
मेल्यानंतरही तुझी आठवण,
माझ्या आत्म्याबरोबर असेल”
आणि
तू अकालीच निघून गेलीस….
पण थेट प्राणात रुतून बसली
आहेस—-
पाऊस कसाही मोसमी- बेमोसमी,
तू मात्र शाळेत असल्यापासून,
श्वासात भरून घेतलेल्या,
मृदगंधासारखी !!!
☆
© प्रभा सोनवणे
४ मे २०२४
संपर्क – “सोनवणे हाऊस”, ३४८ सोमवार पेठ, पंधरा ऑगस्ट चौक, विश्वेश्वर बँकेसमोर, पुणे 411011
मोबाईल-९२७०७२९५०३, email- [email protected]
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
