श्री राहूल लाळे
चित्रकाव्य 
– वटपौर्णिमा… – ☆ श्री राहूल लाळे ☆
☆
तो वड एक महान
घालून प्रदक्षिणा ज्याला
परत मिळवले सावित्रीने
आपल्या प्रिय पतीचे प्राण
*
तो आणि असे अनेक वड
अजूनही उभे आहेत
पाय जमिनीत रोवून घट्ट
ऐकतात दरवर्षी ते
नवसावित्रींचें पतीहट्ट
*
वडाला फेऱ्या मारणाऱ्या
दोरीचे बंध बांधणाऱ्या,
सगळ्याच स्त्रिया का सावित्री असतात ?
ज्यांच्यासाठी त्या व्रत करतात
सगळे का ते सत्यवान असतात ?
*
सात जन्मी हाच मिळावा जोडीदार
यासाठीच होते जरी प्रार्थना
मनात दोघांच्या असतात का
नक्की तशाच भावना ?
*
सावित्रीला आजच्या.. खरंच का हवा आहे
सत्यवान तो जन्मोजन्मी ?
आणि ज्याच्यासाठी उपास करतात
सत्यवानाला त्या हवीय का तीच सावित्री पुढल्या तरी जन्मी !!!
*
सावित्री -सत्यवान महती त्यांची थोर
त्यांच्यापुढे आपण सारे लहानथोर
महत्वाची आहे तरी प्रेमभावना
*
सात जन्म कोणी पाहिलेत ?
हाच जन्म महत्वाचा
मिळाली ती सावित्री
आहे तो सत्यवान जपायचा
*
संस्कार म्हणून वटपौर्णिमा
सण साजरा करत राहूया …
पतीपत्नी सारे विश्वास अन् प्रेमाचं रोप सतत फुलवत ठेऊया
☆
© श्री राहुल लाळे
पुणे
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
