सुश्री संगीता कुलकर्णी
☆ क्षण सृजनाचा ☆ कॉफी, पाऊस आणि कविता… ☆ सुश्री संगीता कुलकर्णी ☆
माझ्या आयुष्यात “काॅफी, पाऊस आणि कविता ” या तीन गोष्टी एकत्र आल्या आणि काही क्षण सुखाचे करून गेल्या..! तेच क्षण मी एकत्र करून कवितेच्या रुपात कागदावर मांडले…!
जितकी साधी जीवाला भावणारी कॉफी, जितका जिव्हाळयाचा पाऊस तितक्याच साध्या सरळ, भावणा-या माझ्या कविता…!
कुठल्या तरी वळणावर, कळत- नकळत, काही कारण नसतांना आड वाटेला थांबून एखादा कोवळा क्षण समोर यावा ना तश्या ह्या कविता त्या अनोळखी क्षणासारख्या समोर उभ्या राहिल्या आणि त्या क्षणांनी पहिल्या सरीच्या बेधुंद पावसात मनाला भिजवून टाकल्या…!
☆ म्हणून म्हणावस वाटत की…! ☆
पावसाने चिंब झाली
धरा मृद्गंगंधात भिजली
काॅफी, पाऊस आणि
कवितांची मैफिल
मनात रंगली
ओलेत्याने धरा सजली
गंध मातीचा दरवळला
कोंब फुटले कवितेला
ओठी कविता
हिरवी झाली
धन गहिवरता अलवार
आभाळ रिते झाले
ओल्या पाऊलखुणांवर बरसावे
वाटेवर चालताना
अर्थाला शब्द मिळावे
शब्दांच्या रानी यावे
मौनाच्या अंगणी
माझे शब्द झरावे
अबोल अव्यक्ताचे
सुरेल गाणे व्हावे…!
© सुश्री संगीता कुलकर्णी
लेखिका /कवयित्री
ठाणे
9870451020
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
