सौ. रेणुका धनंजय मार्डीकर
चित्रकाव्य
सोनफूल हे ओंजळीत मम (सोनटक्का) सौ.रेणुका धनंजय मार्डीकर ☆
(वृत्त लवंगलता.. मात्रा- 8+8+8+4=28)
☆
पर्ण्य भासते पंख पसरुनी फांदी वरती बसले
श्रावणमासी सुबक पांढरे फूल सुगंधी दिसले ||ध्रु||
*
रिमझिमताना सणवारांची रेलचेल ही सारी
सोनटक्क्यास बहर साजरा धुंदी दरवळणारी
मोह घालती फुले पाहुनी देव देवता हसले
श्रावणमासी सुबक पांढरे फूल सुगंधी दिसले ||1||
*
तलम मुलायम श्वेत पाकळी गंधयुक्त झालेली
तिन्ही सांजेला जणू देखणी सुकुमारी आलेली
चंद्र चांदणे तिजला पाहुन चमचम करुनी हसले
श्रावणमासी सुबक पांढरे फूल सुगंधी दिसले ||2||
*
तीन पाकळ्या त्यात जाहले तुषार सिंचन पिवळे
पातळ पातळ जणू नाजुका काय करावे न कळे
शब्दाने मी कोमलकांती सोनटक्क्यास विणले
श्रावणमासी सुबक पांढरे फूल सुगंधी दिसले ||3||
*
बेधुंद होत गंध मोहिनी इकडे तिकडे घुमली
कवने माझी पानथळीला तिथेच सारी रमली
सोनफूल हे ओंजळीत मम् अत्तर देण्या बसले
श्रावणमासी सुबक पांढरे फूल सुगंधी दिसले ||4||
*
© सौ.रेणुका धनंजय मार्डीकर
औसा.
मोबा. नं. ८८५५९१७९१८
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
तुझ्या माझ्या अंगावर… – चित्र एक काव्ये दोन 
