मराठी साहित्य – कवितेचा उत्सव ☆ विजय साहित्य # २८३ – दोषी…! ☆ कविराज विजय यशवंत सातपुते ☆

कविराज विजय यशवंत सातपुते

कवितेचा उत्सव # २८३ – विजय साहित्य

☆ दोषी…! ☆

(मात्रा वृत्त – २५ मात्रा)

☆

माझ्याआधी, मलाच गेले, वाचून कोणी

उपदेशाचे, डोस पाजले, हासून कोणी. १

*

चेष्टा, टिंगल, आणी टवाळी, झाली कविता

आदर देता, सादर झाले, आतून कोणी.२

*

घनिष्ठ झालो, बघता बघता, ‌या मनी नांदलो

काळजास त्या, दिली उभारी, राहून कोणी. ३

*

हळवेली पण, मधाळ बोली, संजीवन ते

श्वास फुलांचे, अत्तर गेले, माखून कोणी.४

*

नको‌ तेवढे, वाटत गेलो, धन शब्दांचे

अक्षर काळे, भास्कर झाले, लाजून कोणी.५

*

जपली नाती, वेळ देऊनी हिशेब नाही

नाते गेले, मनासारखे, वागून कोणी.६

*

मतभेदाचे, आले वारे, कडकड नाही

घरात गेले, वहात तेव्हा, पाहून कोणी.७

*

हाकेसरशी, दमात एका, आधार झालो

विश्वासाला, हलाल केले, मागून कोणी.८

*

घर शेणाचे, घर मेणाचे, जमले नाते

अनुभवांचे, दार घेतले, लावून कोणी.९

*

हात लिहिते, थांबले कधीचे कळले नाही

विडा निरोपी, हातावरचा, चाखून कोणी.१०

*

लळा‌ लावूनी, गळा कापला, कविराजाचा

स्वभाव‌ ठरला, दोषीच तेव्हा, टाळून कोणी.११

☆

© कविराज विजय यशवंत सातपुते

सहकारनगर नंबर दोन, दशभुजा गणपती रोड, पुणे.  411 009.