सौ. रेणुका धनंजय मार्डीकर
चित्रकाव्य
कदंब फुलतो… सौ.रेणुका धनंजय मार्डीकर ☆
(वृत्त अनलज्वाला, मात्रा-8+8+8=24)
☆
गडगडणारा ढग येताना कदंब फुलतो
झरझरणाऱ्या पावसधारा कदंब खुलतो ||ध्रु||
*
वरीसवे हलती त्याच्या धुंद शलाका
यमुनाजळही खळखळ खळखळ देते हाका
कान्हासंगे वृंदावनात खेळ खेळतो
झरझरणाऱ्या पावसधारा कदंब खुलतो ||1||
*
चेंडू सुमने केशर कांती फांदीवरती
कान्हासंगे गोप खेळती अवतीभवती
अमृत प्राशन केल्याने हा अखंड झुलतो
झरझरणाऱ्या पावसधारा कदंब खुलतो ||2||
*
कदंब-नीला वाहत येतो गंधित वारा
कादंबरीस म्हणती सारे कदंब मदिरा
कुसुमामधला सुगंध त्याचा मंजुळ घुमतो
झरझरणाऱ्या पावस धारा कदंब खुलतो ||3||
*
सोनवर्खिली मोहक सुमने सुगंध देती
कृष्णसख्याला प्रियक होवुनी जवळी घेती
कदंबोत्सवी मम् शब्दांनी उमल उमलतो
झरझरणाऱ्या पावस धारा कदंब खुलतो ||4||
*
सोन केशरी गुबगुबलेली फुले सुगंधी
मधमाशांचे मोहळ उठते मिळता संधी
शिशुपाल कुणी कुणी हरिप्रिया म्हणुनी गणतो
झरझरणाऱ्या पावस धारा कदंब खुलतो ||5||
*
© सौ.रेणुका धनंजय मार्डीकर
औसा.
मोबा. नं. ८८५५९१७९१८
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
