सौ. रेणुका धनंजय मार्डीकर
चित्रकाव्य
हरसिंगारी तू फुलवंती (रातराणी) सौ.रेणुका धनंजय मार्डीकर ☆
(वृत्त : नववधू… ध्रुवपद दोन चरण 2+8+6=16, अंतऱ्याचे पहिले तीन चरण 8+8=16, अंतऱ्याचे मेळाचे चरण 2+8+6=16)
☆
ती कलिका झाली धुंद अशी
अन् सलगी करते वाऱ्याशी ||ध्रु||
*
चमचमणारे गगनी तारे
धरणी वरती आले सारे
वेलीवरती दिसती न्यारे
ही कोमल सुमने तमनाशी
अन् सलगी करती वाऱ्याशी ||1||
*
श्वेत चांदणी लखलखणारी
सुवर्ण भासे चमचमणारी
जग धुंद होय अवतीभवती
मन माझे धावे तुजपाशी
अन् सलगी करते वाऱ्याशी ||2||
*
संध्याराणी तव् सांगांती
तुझ्या रुपाची गाणे गाती
हरसिंगारी तू फुलवंती
चांदणी फूल तू वैद्य जशी
अन् सलगी करती वाऱ्याशी ||3||
*
रातराणीस या पुसू कसे
कुपी सुगंधी बघ तुझ्यातसे
सौंदर्याचे तव् गमक असे
गुज खोल तुझे माझ्यापाशी
अन् सलगी करते वाऱ्याशी ||4||
*
मी मुग्ध जाहले तुझ्या परी
हरितामधली तू सोनपरी
मम् कवने सजली तुझ्यावरी
तव् नाते जुळले शब्दाशी
अन् सलगी करते वाऱ्याशी ||5||
*
© सौ.रेणुका धनंजय मार्डीकर
औसा.
मोबा. नं. ८८५५९१७९१८
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
