सुश्री मंजुषा सुनीत मुळे
☆ क्षण सृजनाचा ☆
☆ धटिंगण … (कविता) ☆ सुश्री मंजुषा सुनीत मुळे ☆
परवा आणि काल राज्यात अनेक ठिकाणी प्रचंड पाऊस सुरू असल्याच्या बातम्या सतत ऐकू येत होत्या … अनेक ठिकाणी पडत असलेल्या मुसळधार पावसाचे .. कुठे कुठे पडत असलेल्या गारांचे व्हिडीओज व्हाट्सअप वर आणि टी व्ही वरच्या बातम्यांमध्ये सतत बघायला मिळत होते. आमच्या गावातही दुपारभर स्वच्छ असलेलं आकाश दुपारनंतर झाकोळायला लागलं होतं… आणि ते सगळं वातावरण पाहून पावासाच्याही आधी मनात शब्दांची टपटप सुरू झाली … गारा वेचाव्यात तसे घाईघाईने ते शब्द वेचतांना अचानक कागदावर तशीच घाईघाईने उतरली एक कविता .. .. .. ..
☆ धटिंगण … ☆
☆
निळ्याशार त्या आकाशात
अवचित आला ढग काळा
एकटं न येता, सोबतीला
आणला सगळा गोतावळा .. .. ..
*
पाहून त्याला घाबरले
सगळे ढग पांढरे पांढरे
निवांत मुक्त बागडणारे
क्षणात झाले कावरेबावरे .. .. ..
*
इथे तिथे जागा शोधून
बसले सगळे लपून
मग आभाळाची निळाईही
बसली मागे दडून .. .. ..
*
यजमान गायब झाले सगळे
पाहुणे काळे चिडले
सैरभैर होऊन आभाळभर
शोधत त्यांना राहिले .. .. ..
*
संताप झाला .. संयम संपला
अन गर्जना सुरु झाल्या
शीर कपाळी तडतडे तशा
विजा तडतडू लागल्या .. .. ..
*
संतापाचे अश्रू अनावर
भान विसरून कोसळले
धटिंगणाने धरेला उगीच
धो धो झोडपून काढले .. .. ..
☆
© सुश्री मंजुषा सुनीत मुळे
९८२२८४६७६२
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुंदर कविता मंजूषा ताई