श्री दिवाकर बुरसे
☆ क्षण सृजनाचा ☆ ‘राष्ट्रीय सुरक्षितता सप्ताह..’ ☆ श्री दिवाकर बुरसे ☆
प्रतिवर्षी ४ ते १० मार्च या काळात ‘राष्ट्रीय सुरक्षितता सप्ताह’ देशभर साजरा केला जातो. औद्योगिक क्षेत्रात याचे विशेष महत्व आहे. या वर्षीच्या- आजच्या ४मार्चला सुरू होत असलेल्या – सुरक्षितता सप्ताहानिमित्त वाचकांना एका कवितेची अल्पशी भेट आणि सर्वांना सुरक्षित जीवन लाभावे ही ईश्वरचरणी ‘यंत्रदासा’ची मनोमन प्रार्थना.
☆ तुझा तूच त्राता ☆
☆
पहा मानवा, यंत्रक्रांतीमुळे आज
मानेवरी बैसली जोखडे
सुरक्षीतता पाहणे काम तूझे
जरी ध्यान कोणी न दे त्याकडे।।धृ।।
*
जसा लागला शोध चक्रा-गतीचा
जगाने गती घेतली केवढी
कुणाला नसे थांबण्या वेळ आता
मढ्यांना इथे स्वस्थता तेवढी!
अशा जीवघेण्या प्रवाहातुनीही
तुला जायचे पैलतीराकडे
सुरक्षीतता पाहणे काम तूझे
जरी ध्यान कोणी न दे त्याकडे।।१।।
*
किती वादळी वेग हे वाहनांचे
तयातून जाणेच आहे सुखे
वितीचे तुझे पोट! जे जाळण्याला
पडे खेळणे अग्निसंगे इथे
तरी पाळ सारे इशारे दिलेले
जराही नको वागणे वाकडे
सुरक्षीतता पाहणे काम तूझे
जरी ध्यान कोणी न दे त्याकडे।।२।।
*
पहा, वाहते ‘गोगली‘ शंख पाठी
ढके वादळी ‘उंट‘ नाका सुखे
अती दक्षतेने चले ‘सूरवंट‘
‘मधूमक्षिकां‘ची पहा कौतुके
वनी ‘अस्वले‘ भाकऱ्या साठवीती
मनू का असे हीन त्यांच्या पुढे?
सुरक्षीतता पाहणे काम तूझे
जरी ध्यान कोणी न दे त्याकडे।।३।।
*
तुझा तूच त्राता, नसे अन्य कोणी
मनी जाण हे सत्य जे सांगतो
अती दक्षतेने सदा वागतो जो
तयाचीच चिंता हरी वाहतो!
न घे काळजी देह, यंत्रा-धनाची
असा जीव देवा कदा नावडे
सुरक्षीतता पाहणे काम तूझे
जरी ध्यान कोणी न दे त्याकडे।।४।।
🙏🏽
© श्री दिवाकर बुरसे
पुणे
संपर्कः ९२८४३००१२५, ९५५२६२९२४५
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
