श्री हरिश्चंद्र कोठावदे
📚 क्षण सृजनाचा 📚
☆ दिले निमंत्रण अवकाशाला… ☆ श्री हरिश्चंद्र कोठावदे ☆
☆
‘ऐलपैल’ हा माझा पहिलावहिला कवितासंग्रह. त्याचा प्रकाशन सोहळा दि. १६ ऑगस्ट २०२४ रोजी पुण्याच्या एस्. एम्. जोशी सभागृहात संपन्न झाला. अध्यक्ष होते नामवंत साहित्यिक, समीक्षक, संपादक डॉ. प्रा. रमेश वरखेडे आणि प्रमुख पाहुणे होते प्रख्यात निवेदक, वक्ते, संपादक व ‘शब्दमल्हार’चे प्रकाशक मा. स्वानंद बेदरकर. सूत्रसंचालक होते ‘मधुश्री’प्रकाशनाचे मा. पराग लोणकर. मा. वरखेडे सरांनी माझ्या कवितांचे केलेले साक्षेपी समीक्षण सह्रदय समीक्षेचा वस्तुपाठ ठरावा. स्वानंदाने आपले मनोगत व्यक्त करतांना माझ्या काही कवितांचे वाचनही केले. मन आणि कान धन्य करणारा तो एक अनन्यसाधारण अनुभव होता. रसिक, मित्र, आप्तांची उपस्थिती आणि प्रतिसाद यांनी मन भरून आले. त्याचा संदर्भ असलेली ही कविता :
☆ दिले निमंत्रण अवकाशाला ☆
*
दिले निमंत्रण अवकाशाला, क्षितिजतटावर बाहू पसरुन
उरी घ्यावया धरेस एका, किति आभाळे आली दाटुन
*
अंध गुहेचे दार बंद हे, कुणी उघडले किती दिसांनी
मोरपीस किरणांचे फिरले, काळोखावर जणु युगांनी
*
पत्ता शोधित आले दारी, दूर दिशांतुन काही पक्षी
वठल्या रानी पानोपानी, वसंत फुलवित रेखित नक्षी
*
रसज्ञ आले आप्त मित्रही, घ्याया श्रवणी कवनकहाणी
स्मरून अपुला जुना जिव्हाळा, दाखल झाले जिवलग कोणी
*
विदग्ध वक्ते मंचावरती, (त्यात जरासा एक कवीही)
ह्रदयीचे ह्रदयाशी घेण्या, झाले उत्सुक श्रवणभक्तही
*
प्रगल्भ रिमझिम रसवंतीची, बरसु लागली मंचावरुनी
सचैल भिजली अवघी मैफल, कृतार्थ झाली माझी गाणी
*
जुने भेटता पुन्हा नव्याने, पुन्हा नव्याने जन्मा आलो
रिंगण तुमचे पडता भवती, उचंबळाचा सागर झालो
*
अनन्य उत्कट अमृतक्षण हा, तुमची किमया तुमचे देणे
अवचित यावे जसे फळाला, कधीकाळचे पुण्य पुराणे
*
जन्ममृत्युच्या वेशीवरती, अंधुक धूसर होता सारे
आप्त मित्र अन् रसिकजनांनो!करतिल सोबत तुमचे तारे !
☆
© श्री हरिश्चंद्र कोठावदे
पुणे
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
