Category: कवितेचा उत्सव 2

उज्वला सुहास सहस्रबुद्धे

 कवितेचा उत्सव 

☆ पाऊस… ☆ उज्वला सुहास सहस्रबुद्धे ☆

☆

 वाट पाहते पागोळीची,

 छपरावरून येईल कधी!

टप् टप् टप् टप् ध्वनी त्याचा,

 कानामध्ये घुमेल कधी? … १

* 

 मृग नक्षत्राची चाहूल लागली,

 पण येणे तुझे झाले नाही!

पावसा पावसा ये लवकर,

 तुजविण आमचे जीवन नाही! … २

 *

येतोस जेव्हा तू भरभरून,

 कळत नाही आम्हा किंमत तुझी!

 तुझ्या विना जेव्हा जगतो आम्ही,

 विरहातून जाणीव होई तुझी! … ३

 *

ऋतुचक्राच्या फेऱ्यामधले,

 तुझेच आहे मोठे स्थान!

 तू आलास तर ऐकणार आम्ही,

 तुझे मधुर ते निसर्ग गान! .. ४

☆

© उज्वला सुहास सहस्रबुद्धे

वारजे 

≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री अनिल वामोरकर

  चित्रकाव्य  

तूचि पालनहार खरा… ☆ श्री अनिल वामोरकर ☆

☆

 उदयाचळी पूर्वेला

दर्शन तव घडते

सर्व जीवांचे

तम विलया जाते…

सृष्टीचे संतुलन

तूझ्याच मुळे राही

नवचैतन्य चराचरी

तूझ्याच मुळे येई..

तूझ्याशिवाय

सृष्टीची कल्पना

विदारक होय,

जसे शरीर आत्म्याविना..

रहाटगाडगे सृष्टीचे

तूच चालविशी भास्करा

तूचि अरुणा जगताचा

पालनहार खरा…

☆

© श्री अनिल वामोरकर

अमरावती

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री प्रमोद वामन वर्तक  

  चित्रकाव्य  

आठ त्रेपन्न!   श्री प्रमोद वामन वर्तक ☆

☆

जीव गुदमरला वडाचा 

फास बसताच दोऱ्याचा 

फळा फुलांच्या भाराने 

दबला आवाज मुळांचा

*

बदलले साऱ्या सणांचे 

साजरे करण्याचे रंग 

वट पौर्णिमा राखून आहे 

आपला पारंपरिक ढंग

*

छाटून हात पाय वडाचे 

त्याला कशास दुखवावे 

करुनी मानसपूजा घरात 

तुम्ही सत्पात्री दान करावे

*

तन करी पूजा वडाची 

मन धावते स्टेशनकडे 

आठ त्रेपन्न चुकली तर 

साहेब घेतील वाकडे

साहेब घेतील वाकडे

☆

© प्रमोद वामन वर्तक

संपर्क – दोस्ती इम्पिरिया, ग्रेशिया A 702, मानपाडा, ठाणे (प.) 400610 

मो – 9892561086 ई-मेल – pradnyavartak3@gmail.com

≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

दीप्ती कुलकर्णी

 कवितेचा उत्सव 

☆ हाक सृष्टीची… ☆ दीप्ती कुलकर्णी ☆

(काव्यप्रकार:- अष्टाक्षरी * मातृ-पितृ छाया)

☆

 मायबापां ची ही छाया

 स्मरतसे नित्य माया

स्म्रृतीगंध दरवळे

भिजतेही चिंब काया…!

* 

आई एक नाते असे

घास देत भरविते

स्वत: तीच तृप्त होते

बाळ ते जेंव्हा जेवते…!

 *

पिता छत्र धरतसे

शिस्त-धाक ठेवतसे

लेकरेच ती सर्वस्व

सदा मनी मानतसे…!

 *

कल्याणही चिंततात

आई-बाप कृपावंत

ऋण त्यांचे जगी थोर

जीवनही वेचतात…!

 *

ठेवा भान लेकरांनो

मायेलाया नाही मूल्य

लेकरांना घडविती

ठेवा देती तो अमुल्य…!

☆

© दीप्ती कोदंड कुलकर्णी

हैदराबाद

भ्र.९५५२४४८४६१

 ≈संस्थापक संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

रेणुका धनंजय मार्डीकर

  चित्रकाव्य  

मयूरशिखेची फुलवारी…  रेणुका धनंजय मार्डीकर ☆

 भावगीत (वर्ण संख्या १२ यति ६ व्या अक्षरावर) 

☆

कोंबड्या कोंबड्या दिसतोस भारी 

रानी वनी राजा तुझी ललकारी ||ध्रु||

*

काळी काळी माती ओली पहा झाली 

कुर्डूच्या भाजीने हिरवाई ल्याली

पाने तुझी किती आरोग्य देणारी 

रानी वनी राजा तुझी ललकारी ||१|| 

*

गुलाबी पांढरी चंदेरी रुपेरी 

मलमल सारी अंगावर पेरी 

मयूरशिखेची दिसे फुलवारी 

रानी वनी राजा तुझी ललकारी ||२||

*

पावसा संगती सुमने सजली

मुलायम माझ्या मनात रुजली 

मांजरी साजरी तरारली सारी

रानी वनी राजा तुझी ललकारी ||३||

*

पावसाळा आला कुर्डूने घेतला 

साज नवा नवा मोहक वाटला 

मऊ मऊ तुझी पाकळी फुलारी

रानी वनी राजा तुझी ललकारी ||४||

☆

© रेणुका धनंजय मार्डीकर

औसा.

मोबा. नं.  ८८५५९१७९१८

≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री हरिश्चंद्र कोठावदे

 कवितेचा उत्सव 

☆ बरेच झाले… ☆ श्री हरिश्चंद्र कोठावदे ☆

☆

खूप तिष्ठलो ज्यांच्यासाठी ते नच आले.. बरेच झाले

अनाहुतांशी जुळले बंधन युगायुगांचे.. बरेच झाले

* 

प्रकाशवर्षे ज्यांचे अंतर, किती निकट ते दिसती तारे

दृश्य दृष्टीच्या अद्वैताचा फिटला संभ्रम.. बरेच झाले

 *

वंदनीय त्या जखमा ज्यांनी, अंत:करणा आभाळ दिले

समशेरींनो ऋण तुमचेही आले ध्यानी.. बरेच झाले

 *

आडातिल हे उसने पाणी, झरे दूरचे उदंड दाते

सोस न उरला पोहऱ्यास या श्रेयाचाही.. बरेच झाले

 *

चुकलो वाटा अनुभवली पण, अज्ञाताची अद्भुत नगरी

कधी शुभंकर दिशाभूलही, कळले पांथा.. बरेच झाले !

☆

© श्री हरिश्चंद्र कोठावदे

≈ संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्रीशैल चौगुले

 कवितेचा उत्सव 

☆ गार झुलवा... ☆ श्रीशैल चौगुले ☆

☆

वैषाखी अंगारा निवला

पश्चीमी वार्याचे गमन

ऋतू घनांचा हर्ष मना

पाखरांचे झुले सदन.

* 

सुगरण ही विहारते

रान-माती प्रतिक्षा धरी

पहिला थेंब काळजात

स्पर्श सुखाचा फुले उरी.

 *

मृग नाचत येई आता

रिमझीम गारवा गंध

ओहोळ सज्ज जळी न्हाणे

गगन-धरा ओले बंध.

 *

मानव-पशू ऋतू ऋणी

पाऊस भिजवेल भाव

जिथे-तिथे झुलते दृष्य

क्षणात लुप्त सूर्य ताव.

 ☆

© श्रीशैल चौगुले