Marathi Kavita
नीलांबरी शिर्के
चित्रकाव्य
☆ बहर… ☆ नीलांबरी शिर्के ☆
☆
उन्हाचा तडाखा
उष्णता कहर
फुलांचा बहर
कैसा बाई !!
*
फुलांना बहर
सुवास कहर
फुले ताटभर
सजली बाई !!
*
वेगवेगळाली
फुले ही एकत्र
अत्तर सर्वत्र
वाटे बाई !!
*
ताटातली फुले
देवाच्या चरणी
जगणे कारणी
लागे बाई !!
*
आपलाही जन्म
फुलापरी व्हावा
जगणे संपता
निर्माल्य व्हावा !!
☆
© सुश्री नीलांबरी शिर्के
≈संस्थापक संपादक – श्री हेमन्त बावनकर/सम्पादक मंडळ (मराठी) – उज्ज्वला केळकर/श्री सुहास रघुनाथ पंडित /मंजुषा मुळे/गौरी गाडेकर≈
ज्योती कुळकर्णी
कवितेचा उत्सव
☆ कसे जगावे… ☆ ज्योती कुळकर्णी ☆
☆
हाती आल्या क्षणांस पकडत जगून घ्यावे थोडे
नशिबामधले ताट सुखाने हसून खावे थोडे
*
कसे नेहमी सावध राहू? कधी वहावत जावे!
कुठलीही का नशा असेना झिंगत जावे थोडे
*
भांडण त्यांचे दोघांचे पण मला ओढले त्यांनी
इच्छा नसता मला लागले उगा लढावे थोडे
*
कोसो होते दूर दु:खही म्हणून होते शीतल!
परदु:खाची जाण असावी, कढ सोसावे थोडे
*
मूठ झाकली अज्ञानाची नको उघडुनी दावू
जाणत नसतो, जेव्हा उत्तर, गप्प बसावे थोडे
*
रहाटगाडा फिरत राहतो कृपा कुणाची आहे?
समाजसेवक निरपेक्षपणे झटत असावे थोडे
*
किती करावे! अजून कौतुक, बाई आहे म्हणुनी
संघर्षाचा वसा घेउनी सिद्ध करावे थोडे
☆
© ज्योती कुळकर्णी
अकोला
मोबा. नं. ९८२२१०९६२४
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
कविराज विजय यशवंत सातपुते
कवितेचा उत्सव # २९५ – विजय साहित्य
☆ सृजन संगत…! ☆ कविराज विजय यशवंत सातपुते ☆
☆
हळवे अंतर
जपता जपता
जाणीव असावी
घडता घडता…! १
*
गिरवा अक्षर
धूळपाटीवर
स्वरादि व्यंजन
मना मनावर…! २
*
जीवन संचित
संस्कार वारसा
जपू मनांतरी
मौलिक आरसा…! ३
*
गरजे पुरती
नसावीत नाती
मनांगणातील
उजळीत वाती…! ४
*
जीव जीवावर
जगतो जडतो
संकट समयी
जगास नडतो…! ५
*
प्रेमळ हृदयी
जाणीव असावी
स्वभाव कस्पटे
मुळीच नसावी…! ६
*
नसावी उणीव
नजरेचा धाक
ऐकू यावी सदा
हृदयाची हाक…! ७
*
असायला हवी
नाराजी शब्दांत
प्रेमाचेच बंध
गुंफलेले त्यात…! ८
*
काका, मामा,नाती
आधाराचे हात
अक्षर धन हे
हवे दिनरात…! ९
*
कमावले किती
जाणीव असावी
प्रेमळ जीवांची
उणीव नसावी …! १०
*
गमावले किती
जाणीव असावी
सृजन संगत
उणीव नसावी…! ११
*
काळाच्याही पुढे
धावणारे मन
उणीव नसावी
आठवांचे क्षण…! १२
*
हिशोबात नको
व्यवहारी माया
झिजवावी प्रेमे
अविरत काया…!१३
*
जाणीव असावी
आपल्या जनांची
उणीव नसावी
प्रेमळ मनांची….! १४
☆
© कविराज विजय यशवंत सातपुते
सहकारनगर नंबर दोन, दशभुजा गणपती रोड, पुणे. 411 009.
मोबाईल 8530234892/ 9371319798.
≈ संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
जयश्री पाटील
कवितेच्या उत्सव
☆ मोहविणारे सारे… ☆ सौ. जयश्री पाटील ☆
(वृत्त – लवंग लता ८+८+८+४=२८)
☆
नदी वाहती काळी माती झुळझुळणारे वारे
हिरवी झाडी वाट वाकडी मोहविणारे सारे
*
पानोपानी सुंदर कोमल किती फुलांची दाटी
किलबिलणlऱ्या इवल्या इवल्या पक्षांची ती घरटी
*
गाणे गाते शिवार हिरवे धनधान्यांच्या राशी
गाय वासरे गोकुळ अवघे भासे मथुरा काशी
*
दूर डोंगरी शिखर मंदिरी भक्तीचा तो मेळा
संस्कारांचे ज्ञान दिले ती माय मराठी शाळा
*
पारावरती न्याय निवाडा सुधारणेच्या गोष्टी
अंगणातही मनामनांच्या संवादांची वृष्टी
*
गावाची मज ओढ लागते जातो वर्षाकाठी
थरथरणाऱ्या हातांचे ते आशिष घेण्यासाठी
*
सरळ मनाने खुल्या दिलाने आलिंगन मी देतो
मायेचा तो झरा गावचा कवेत मजला घेतो
☆
© जयश्री पाटील
विजयनगर.सांगली.
मो.नं.:-8275592044
≈संस्थापक संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
उज्वला सुहास सहस्रबुद्धे
☆ उडी… ☆ उज्वला सुहास सहस्रबुद्धे ☆
☆
जन्म घेतला ज्या माते पोटी,
तिची धन्यता केवढी मोठी!
जिच्या उदरी वीर जन्मा आला,
स्वातंत्र्याचा मंत्र घेऊन ओठी! … १
*
स्वातंत्र्यसंग्रामी घेतली *उडी ,
उभारले स्वातंत्र्य मेळे गावी!
होती धगधगती आग उरामध्ये,
स्वप्न पाही स्वातंत्र्याचे भावी! … २
*
ब्रिटिशांच्या देशात जाऊनी,
ज्वाला पेटवल्या देश प्रेमाच्या!
स्वातंत्र्यासाठी लढणे हेच एक,
स्वप्न भरले उरी सर्वांच्या! … ३
*
मार्सेलीस बंदरात घेतली ,
जगप्रसिद्ध उडी समुद्रात!
झेप त्यांची समजून आली,
धडकी भरे वैऱ्याच्या अंतरात! … ४
*
स्वातंत्र्योत्तर काळात,
उपेक्षा च वाट्याला आली!
निराश न होता त्यांनी,
समाजकारणी उडी मारली! … ५
*
भव्य दिव्य हिंदू राष्ट्राचे,
स्वप्न उराशी बाळगले!
उच्चतम देशप्रेमासाठी,
किती देह कष्ट सोसले! … ६
*
आदर्श त्यांचा मनी धरावा,
प्रत्येकाने तो जोपासावा!
राष्ट्र प्रेमाचा वसा तो घ्यावा,
स्वातंत्र्यवीरा प्रणाम करावा!
☆
© उज्वला सुहास सहस्रबुद्धे
वारजे
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुश्री प्रभा सोनवणे
कवितेच्या प्रदेशात # ३१५
☆ सत्तरी… ☆ सुश्री प्रभा सोनवणे ☆
☆
सत्तरी आली आहे आणि मी तर—
अजून तिथेच घुटमळतेय,
तू आलास आयुष्यात,
त्या वळणावर,
आणि सगळा आसमंत…
घमघमून गेला तुझ्या येण्याचे !
गुणगुणत होते,
“सब कुछ लागे नया नया”
काहीतरी कारण हवे असते–
जगण्याला!
लग्न हे ही एक कारण!
आयुष्य पुढे पुढे सरकत राहिले,
काय खरे काय खोटे ?
मूक स्वीकारले पदरात पडलेले,
प्रत्येक दान—
ईश्वरी संकेत समजून!
आज तू नाहीस,
पण माझ्या सगळ्याच,
विशीतल्या आठवणी–‘
“तरोताज़ा” —-
मी उगाचच लावतेय हिशेब,
असे झाले नसते तर —-
तर तसेही झाले नसते!
आता सत्तरीत केली जरी–
परतीच्या प्रवासाची तयारी,
तरी मन आसक्तच!
भविष्याच्या गडद अंधारात,
हवाय मला चिमूटभर प्रकाश!
तुझ्याच पावलावर पाऊल ठेवून–
मी येतेच आहे,
पण —
गतजन्मीचे हे सारे पाश,
जेव्हा सुटतील तेव्हाच!!
कुणीतरी म्हटलंय ना —
“खाली हाथ आए है, खाली हाथ जाना है !”
तरीही—
आज सत्तरीत मी माझी विशी आठवतेय!!
☆
© प्रभा सोनवणे
संपर्क – “सोनवणे हाऊस”, ३४८ सोमवार
पेठ, पंधरा ऑगस्ट चौक, विश्वेश्वर बँकेसमोर, पुणे 411011
मोबाईल-९२७०७२९५०३, email- sonawane.prabha@gmail.com
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
म. ना. दे. (श्री मयुरेश देशपांडे)
कवितेचा उत्सव
☆ || स्वप्ने पैशाची || ☆ म. ना. दे. (श्री मयुरेश देशपांडे) ☆
☆
सर पावसाची येते, तसा येत राहो पैसा
कष्ट छोटे फळ मोठे, काही मार्ग मिळो ऐसा
*
बिछान्यात अंथराया, हवी चादर पैशांची
हाक नुसती मारता, पायी लोळण सुखांची
*
ऐन उन्हाळ्यात वाहो, खोली भर गार वारा
घशा कोरड पडता, थंड थंड जल धारा
*
चार नोकर चाकर, फिरण्यास चार चाकी
कुठे दिसता वाटेत, सारे आदराने वाकी
*
काय तोशिक खर्चाची, स्वप्ने पाहण्यास छान
जरी आज पायथ्याशी, वर उंचावून मान
☆
कवी : म. ना. देशपांडे
(होरापंडीत मयुरेश देशपांडे)
+९१ ८९७५३ १२०५९
https://www.facebook.com/majhyaoli/
≈संस्थापक संपादक – श्री हेमन्त बावनकर/सम्पादक मंडळ (मराठी) – उज्ज्वला केळकर/श्री सुहास रघुनाथ पंडित / मंजुषा मुळे/ गौरी गाडेकर≈
श्री अशोक श्रीपाद भांबुरे
अशोक भांबुरे जी यांची कविता अभिव्यक्ती # ३२८
☆ पाळतात साप… ☆ श्री अशोक श्रीपाद भांबुरे ☆
☆
आज वावरत आहे, किती रुबाबात साप
कात टाकुन कोडगे, काही फिरतात साप
*
पाय जपुन टाकावा, जंगलात फिरताना
पाय चुकीचा पडता, येथे डसतात साप
*
जात बहिरीच त्यांची, भाषा समजत नाही
काठी पाहुन बिळात, सारे शिरतात साप
*
असो सागर वा भूमि, न्याय सर्व जगी एक,
छोट्या सापास सहज, मोठे गिळतात साप
*
किडा सावध नसावा, घात म्हणूनच झाला
दबा धरूनच येथे, काही असतात साप
*
गावामध्ये शिरतात, काही घुसखोर साप
फकिराच्या वेषातच, काही फिरतात साप
*
फार विषास मागणी, काळ्या बाजारी ह्या
नसतात ते गारुडी, तरी पाळतात साप
☆
© अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्रीशैल चौगुले
कवितेचा उत्सव
☆ – हायकू – ☆ श्रीशैल चौगुले ☆
☆
१.
वैशाखी झळ
धरित्री तळमळ
कलीस बळ
२.
मनास तडा
हळदि अंग पाढा
ऊन्हाळी विडा.
३.
अंतरी लाव्हा
काळजाची स्पंदने
ऋतूचे साम्राज्य
४.
पक्षांचा शोध
सावलीही दुर्मिळ
पारधी तृष्णा.
५.
संघर्ष मन
मृदा भंग निर्धन
आक्रोश भाव.
६.
कुणास कसा
नसावा मागमूस
जळ थेंबाचा
७.
गळती घाम
अस्वस्थ लाही-लाही
निरभ्र नभ.
८.
भडक लाल
हिरवे जर्द हात
काटेरी मुखे.
९.
स्वरल ध्वनी
आम्रवनी उगीच
स्मृतींना साद.
१०.
प्रेम बहर
याद ती पांघरुन
सदैव ऋतू
११.
धुंद नजर
पालवीत वेदना
जूनेच बेट.
१२.
अथांग लाटा
कोरडीच तहान
समुद्रच का… ?
☆
© श्रीशैल चौगुले
मो. ९६७३०१२०९०.
≈ संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
श्री आशिष बिवलकर
चित्रकाव्य
ना उरला कोणी वाली... श्री आशिष बिवलकर ☆
☆
शिक्षणाचा बाजार मांडला,
उमेदींना ना उरला कोणी वाली |
अंगठा मागणारे द्रोणच सारे,
एकलव्या सांग रे तुझी खुशाली |
*
रात्रंदिवस डोळ्यात तेल घालून,
किती रे केला होतास अभ्यास |
शिक्षण व्यवस्थेतल्या मंथरेमुळे,
रामाच्या नशिबी पुन्हा वनवास |
*
कोणी विकली शेतीभाती,
कोणी गहाण ठेवले घरदार |
ऋण मुलांच्या शिक्षणासाठी,
सणवार विसरून उसन उधार |
*
उज्वल भवितव्याचे स्वप्न उराशी,
मार्ग तो धरला सरळ असा तो नीट |
कुंपणानेच शेत फस्त केलं आता,
भ्रष्ट शिक्षण व्यवस्थेचा आलाय वीट |
*
आई वडिलांची भिस्त तुझ्यावर,
टोकाचं पाऊल तू उचलू नकोस |
हातातोंडाशी आलेला घास त्यांचा,
अविवेकाने हिरावून घेऊ नकोस |
*
नीटच्या दलालांनी दिला धोका,
धीट राहून प्रयत्न तू करत रहा |
रात्रीच्या गर्भात उष:काल उद्याचा,
उज्वल भविष्याचे स्वप्न पहात रहा |
©️ वास्तवरंग
☆
(चित्र सौजन्य – श्री आशिष बिवलकर)
© श्री आशिष बिवलकर
बदलापूर
मो 9518942105
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
