सूचना/Information
(साहित्यिक एवं सांस्कृतिक समाचार)
💐 अ भि नं द न !! 💐 हार्दिक अभिनंदन !!!💐
☆ “वुमेन आयकॉन अवॉर्ड” – डॉ. भारती माटे – अभिनंदन ☆
‘वुमेन वर्ल्ड रेकॉर्ड्स’ द्वारे “वुमेन आयकॉन अवॉर्ड ” हा विशेष असा एक पुरस्कार दरवर्षी दिला जातो, आणि त्यायोगे प्रेरणादायी आणि अपवादात्मक कार्य करणाऱ्या स्त्रियांच्या यशोगाथांचा आणि त्यांनी केलेल्या उल्लेखनीय कामाचा सन्मान करण्यात येतो.
… आणि अतिशय आनंदाची गोष्ट म्हणजे, २०२६ सालच्या या प्रतिष्ठित सन्मानासाठी पुणे येथील फाइन आर्टमधील प्रसिद्ध व्हिज्युअल प्रॅक्टिशनर डॉ. भारती माटे यांना निवडले गेले.
… डॉ. भारती माटे या आपल्या ई – अभिव्यक्ती साहित्य- मंचाच्या पहिल्या दिवाळी विशेषांकापासून गेली सतत चार वर्षं या अंकाचे अतिशय सुंदर आणि आकर्षक मुखपृष्ठ तयार करून देणाऱ्या आपल्या समूहातील ज्येष्ठ सदस्या आहेत.
डॉ. भारती माटे यांनी फाइन आर्ट पेंटिंगच्या क्षेत्रात अतिशय उल्लेखनीय आणि सर्जनशील कामगिरी करून दाखवली आहे. भारतीय संस्कृतीतील ‘रांगोळी’ सारख्या प्राचीन लोककलेला स्वतःच्या नवनव्या सिद्धहस्त प्रयोगांतून साकार केलेल्या भावपूर्ण आणि अर्थपूर्ण कलाकृतींद्वारे त्यांनी एक नवे आणि सुंदर रूप दिले आणि त्याद्वारे जमिनीवर असणारी रांगोळी त्यांनी कॅनव्हासवर आणली आहे …जी फ्रेम करून भिंतीवर लावता येते.
ललित कलांच्या दालनात समृद्ध आणि सुंदर भर घालणाऱ्या या कामातले त्यांचे कौशल्य आणि त्यातली त्यांची सफाई विलक्षण आहे. व्हिज्युअल आर्ट्सबद्दलची त्यांची उत्कटता, त्यांच्या नवनवोन्मेषशाली कल्पना आणि सौंदर्यशास्त्राबद्दलचा त्यांचा गाढा अभ्यास आणि त्यासोबतच त्यांचा वचनबद्धपणा यामुळे या विशेष क्षेत्रात त्यांनी स्वतःचा मोठाच ठसा उमटवलेला आहे. याच्या जोडीनेच त्यांच्या या कलात्मक प्रवासाद्वारे उद्याच्या उदयमान कलाकारांना प्रेरणा देत असतांनाच, सांस्कृतिक आणि सर्जनशील अभिव्यक्तीना समृद्ध करण्यात त्या मोठेच योगदान देत आहेत.
त्यांना देण्यात आलेला हा जागतिक पातळीवरचा विशेष पुरस्कार म्हणजे त्यांच्या प्रतिभेचे, प्रयोगशीलवृत्तीचे, चिकाटीचे आणि फाइन आर्ट्सच्या जगातील त्यांच्या मौल्यवान योगदानाचे प्रमाणपत्र आहे. आणि आपल्या समूहासाठी ही नक्कीच अतिशय आनंदाची आणि अभिमानाची बाब आहे.
ह्याशिवाय कविता, ललित लेखन, भरतकाम, विविध विषयांवरील संशोधनात्मक लेखन, आणि ही अंगभूत कला आणखी विकसित करण्यासाठी करत असलेली विविध प्रांतांमधली डोळस भटकंती.. अशी त्यांची चौफेर मुशाफिरी नित्य चालूच असते.
आपल्या सर्वांतर्फे भारतीताईंचे अगदी मनःपूर्वक अभिनंदन आणि यापुढेही या वेगळ्याच क्षेत्रातली त्यांची विलक्षण म्हणावी अशी वाटचाल याहूनही जास्त दैदिप्यमान ठरो या त्यांना अगदी मनःपूर्वक शुभेच्छा.
संपादक मंडळ
ई अभिव्यक्ती मराठी
☆ ☆ ☆ ☆ ☆
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
