रेणुका धनंजय मार्डीकर
चित्रकाव्य
ही जलपर्णी… रेणुका धनंजय मार्डीकर ☆
(वृत्त : शुभगंगा (८+८+६=२२)+ उद्धव(२+८+४=१४))
☆
ही जलपर्णी भासतसे मनहरणी
मनमोही ही जलपर्णी ||ध्रु||
कोणी म्हणती ही आहे बहु भयहारी
अन् जीवन संपवणारी
पण ऐका जन हो आहे ही गुणकारी
जल शुद्ध शुद्ध करणारी ||१||
जांभुळलेल्या पुष्पांभवती हे सादर
ते मोरपिस जणू सुंदर
ही फुलवंती शोभतसे मनहारी
पर्णावर शोभा सारी ||२||
गढुळले पहा जलाशयाचे पाणोठे
ही उगवत जाते तेथे
पाण्यावरती पखरण घालत फिरणारी
जांभळी जांभळी न्यारी ||३||
जलवेली या नावे कोठे ओळखती
जलकुंभी नामे गणती
निर्माण किती कलाकृती करणारी
पान खोड जादुगारी ||४||
☆
© रेणुका धनंजय मार्डीकर
औसा.
मोबा. नं. ८८५५९१७९१८
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
