वाचताना वेचलेले
🌺 “अनंत चतुर्दशी …!!!” लेखक : अज्ञात 🌺 प्रस्तुती – श्री सुनीत मुळे ☆
ज्याक्षणी या शरीरात अडकणं संपेल
तो क्षणच अनंत – चतुर्दशी !
जेव्हा अहम् आणि त्वम् एकजीव
होतील तीच अनंत – चतुर्दशी !
पाहुणा आहे इथे प्रत्येकजण
बाप्पासारखा काही दिवसांचा
कोणी दीड, कोणी पाच
तर कोणी दहा दिवसांचा…
थोडा वेळ आहोत इथे
तर थोडं जगून घेऊया
बाप्पा सारखे थोडे
लाडू मोदक खाऊन घेऊया…
इथे सर्वच आहेत भक्त आणि
सगळ्यांमध्ये आहे बाप्पा
थोडा वेळ घालवू सोबत
आणि मारु थोड्या गप्पा…
मनामनातले भेद मिटतील
मिटतील सारे वाद
एक होईल माणुस
आणि साधेल सुसंवाद…
जातील निघून सारेच
कधी ना कधी अनंताच्या प्रवासाला
ना चुकेल हा फेरा
जन्माला आलेल्या कोणाला…
बाप्पा सारखे नाचत यायचे
आणि लळा लावून जायचे
दहा दिवसांचे पाहुणे आपण
असे समजून जगायचे…
किंमत तुमची असेलही
तुमच्या प्रियजनांना लाख
आठवणी ठेवतील जवळ
अन् विसर्जित करतील तुमची राख…
पाहुणा आहे इथे प्रत्येकजण
दीड दिवस अन् दहा दिवसाचा
हे जगणे म्हणजे एक उत्सव
हा काळ दोन घडींच्या सहवासाचा…
लेखक : अज्ञात
संग्राहक : श्री सुनीत मुळे
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
