Category: मराठी

शालिनी जोशी

 

  चित्रकाव्य  

पारिजातक... शालिनी जोशी ☆

☆

 पारिजातक पुष्प लहान

 परी असे कीर्ति महान 

*

 त्रिलोकांचा प्रवास तरुला 

 समुद्रमंथनातून इंद्र वनाला

*

 श्रीकृष्णाने भूलोकी आणिला

 सत्यभामेचा स्त्री हट्ट पुरविला

*

 शुभ्र पाकळ्यात सुगंध साठा 

 केशरी रंग खुले नाजूक देठा

*

कळ्या रात्रीच्या चांदण्या झाडावर 

 सकाळी केशरी पांढरा सडा भूवर

*

 भरल्या तबकी खुले मोहकपण

 हात न लावता जपा कोमलपण

☆

©  शालिनी जोशी

संपर्क – फ्लेट न .3 .राधाप्रिया  टेरेसेस, समर्थपथ, प्रतिज्ञा मंगल कार्यालयाजवळ, कर्वेनगर, पुणे, 411052.

मोबाईल नं.—9850909383

≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ.मंजुषा मुळे/सौ.गौरी गाडेकर≈

रेणुका धनंजय मार्डीकर

  चित्रकाव्य  

अल्पायुषी कारवी…  रेणुका धनंजय मार्डीकर ☆

(भावगीत (वर्ण संख्या १६, यति ८ व्या अक्षरावर))

☆

सप्तवर्ष तप हिचे आठव्यात येती फुले 

अल्पायुषी कारवी ही पश्चिम घाटात खुले ||ध्रु||

*

निळ्या जांभळ्या रंगाची पठार व्यापत जाते

आकाशाशी जीव जडे मातीशी अतूट नाते

माळ कारवी साजरी कळ्या फुलांवर डुले 

अल्पायुषी कारवी ही पश्चिम घाटात खुले ||१||

*

जांभुळली फुलराणी एकदाच फुलणारी

नीलमणी अंगावर पानासंगे झुलणारी

फनेलच्या आकाराची नाजूकशी कानडुले 

अल्पायुषी कारवी ही पश्चिम घाटात खुले ||२||

*

थंडीमध्ये लपेटली भुमीने शाल बरवी 

कोणी म्हणती बकरा कोणी टोपली कारवी

हिच्या रूपाची मोहिनी मम् काव्यातून झुले

अल्पायुषी कारवी ही पश्चिम घाटात खुले ||३||

☆

© रेणुका धनंजय मार्डीकर

औसा.

मोबा. नं.  ८८५५९१७९१८

≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सुश्री ज्योत्स्ना तानवडे

  चित्रकाव्य  

– पावसाचा पदन्यास – ☆ सुश्री ज्योत्स्ना तानवडे ☆

☆

झाडे दुतर्फा रंगीत 

साज खुलतो रस्त्याचा 

पडणाऱ्या जलधारा 

भास जाहला तळ्याचा ||

*
पाणी जाहले रंगीत 

शोभिवंत प्रतिबिंब 

वेडावुनी झेपावती 

वेगे नाचणारे थेंब || 

*

टपटप लयबद्ध 

आले नाचऱ्या अंगाने 

नक्षी मोहक खुलते 

जळावरी या नृत्याने ||

*

चित्र देखणे रेखिले 

निसर्गाने सौंदर्याचे 

न्याहाळीता अदाकारी 

भान हरपे मनाचे ||

*

पावसाचा पदन्यास

मन चिंब चिंब होई 

लय लाभते मनाला 

आनंदाने गाणे गाई ||

☆

© सौ.ज्योत्स्ना तानवडे

वारजे, पुणे.५८

≈ संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री आशिष  बिवलकर

  चित्रकाव्य  

कालाय तस्मै नमः  श्री आशिष  बिवलकर ☆

☆

आधुनिक झाली सावित्री,

परंपरेची तिला जाण आहे |

सती सावित्री वटपौर्णिमा,

पतिव्रतेचं भाळी वाण आहे |

*

मॉडर्न झाली म्हणून काय,

तिचा पण उपवास आहे |

तिचा जोडीदारपण तिला,

जन्मोजन्मी खास आहे |

*

यंदा टी शर्ट शॉर्ट जीन्स घातली तिने,

त्यांचं बघून ती ही नेसेल साडीचोळी |

संस्कारांकडे वळतेय नवीन पिढी,

साजरी करा हो दसरा दिवाळी होळी |

*

कालाय तस्मै नमः म्हणत,

आधुनिकता स्वीकारायला हवी |

जास्त त्यात वाहत न जाता,

आपली परंपरा जपाया हवी |

*

भरलेलं कपाळ हातात चुडा,

स्त्रीच्या सौभाग्याचं लेणं आहे |

उमजेल तिलाही भविष्यात,

पेहरावाशी सुद्धा देणंघेणं आहे |

©️ वास्तवरंग

☆

(चित्र सौजन्य – श्री आशिष बिवलकर) 

© श्री आशिष  बिवलकर

बदलापूर

मो 9518942105

≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री प्रमोद वामन वर्तक  

  चित्रकाव्य  

तयारी आगमनाची   श्री प्रमोद वामन वर्तक ☆

☆

कर या कलाकारांचे 

रंगविती गणेशाला

जो रंगभरी चराचरी 

धरून अदृश्य कुंचला

*

कळस सदृश्य मुकुट 

केला धारण शिरावर 

गंध नाजूक नजाकतीने 

शोभे भव्य भाळावर

*

बलदंड बाहू तयांचे 

त्यात वाकी शोभे छान 

सुपासारख्या कानाखाली 

गोल गरगरीत मान

*

शुभ्र सुळ्यांच्या मधुनी 

वेलांटी मारे गोड सोंड 

धूत वस्त्रामधून ओसंडे 

गोल गरगरीत दोंद

*

वाट पाहती भक्तजन 

प्राण आणून डोळ्यात 

होता आगमन विघ्नेशाचे 

मोद पसरेल घरात

मोद पसरेल घरात

☆

© प्रमोद वामन वर्तक

संपर्क – दोस्ती इम्पिरिया, ग्रेशिया A 702, मानपाडा, ठाणे (प.) 400610 

मो – 9892561086 ई-मेल – pradnyavartak3@gmail.com

≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

नीलांबरी शिर्के

श्री प्रमोद वामन वर्तक  

  चित्रकाव्य  

जं ग ल रा ज?   श्री प्रमोद वामन वर्तक ☆

☆

परवा धडक दिली बिबटयाने 

मुंबईच्या वेशीवर भायंदरला,

काल आला सोनेरी कोल्हा 

पाणी प्यायला कल्याणला!

*

सगळ्या मुंबापुरीची होणार 

थोड्याच दिवसात राणीबाग,

हावऱ्या मुंबईकरा आता तूच

एका पिंजऱ्यात रहायला लाग!

*

केलास “त्यांच्या” अधिवासाचा 

स्वार्थापोटी खूप सत्यानाश,

आता तुझ्या हद्दीत येऊन 

घेऊ लागले बघ तुझाच घास!

*

अक्कल गहाण ठेवून तुझी 

तू बांधलेस जंगलात मनोरे,

वेळ अजूनही गेली नाही 

आता तरी बंद डोळे उघड रे!

आता तरी बंद डोळे उघड रे!

☆

© प्रमोद वामन वर्तक

संपर्क – दोस्ती इम्पिरिया, ग्रेशिया A 702, मानपाडा, ठाणे (प.) 400610 

मो – 9892561086 ई-मेल – pradnyavartak3@gmail.com

≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

संगीता कुलकर्णी

  चित्रकाव्य  

– स्वप्नात रंगले मी… –  संगीता कुलकर्णी ☆

☆

स्वप्नात रंगले मी 

तुझ्यात हरवले मी

डोळ्यांत तुझंच चित्र 

मनात तुझीच ओढ

तुझ्या प्रेमाच्या रंगात रंगले मी

*

तुझ्या आठवांच्या रंगांनी

मनाच्या कोपऱ्यात सजल्या

नकळत प्रेमाच्या गंधांनी

पानाच्या कॅनव्हासवर

प्रेमाच्या ओळी रेखाटल्या 

*

तुझ्या नावाच्या नाजूक रंगांनी

शब्दही हरवून बसले

तू शब्दांत नव्हतास तू

भावांत दडलेला होतास

माझ्या प्रत्येक श्वासात 

अलगद मिसळलेला होतास

*
तू नसतानाही सोबत

शब्दही गाऊ लागले

मौनही बोलू लागले

तुझ्या आठवांच्या ओंजळीत

भाव सारे विसावले

*

तू नसतानाही सोबत 

तुझ अस्तित्व जाणवत होतं

मनाच्या खोल कप्प्यातून 

तुझ्यातच हरवत होतं

*

मीच माझ्या अंतरंगात

एक अनोखं गाणं झालं

ज्यात हरवणंही सुंदर वाटतं

आणि सापडणंही थांबतं

☆

©  संगीता कुलकर्णी 

लेखिका /कवयित्री

ठाणे

9870451020

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

शुभदा भास्कर कुलकर्णी (विभावरी)

☆

तुझ्या झाकल्या मुठीत 

सुंदर स्वप्नांचे मोती 

नको आणू डोळा पाणी 

गोड हांस ग परीराणी…

*

तुज अंगाई गाऊनी 

सटवाई जोजविते 

स्वप्नांच्या गावी नेऊनी 

खुदुखुदु हसविते…

*

कधी डोळा पाणी येता 

मायेने कुरवाळीते 

कधी सखीही होऊनी 

खेळ तुझा रंगविते…

*

गंमत गोष्टी सांगुनी 

अलगद झोपविते 

हळुवार फुंकरिनी 

तुजला ती जागविते…

☆

कवयित्री : शुभदा भा. कुलकर्णी (विभावरी)

कोथरूड – पुणे, मो.९५९५५५७९०८

≈ संस्थापक संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

रेणुका धनंजय मार्डीकर

  चित्रकाव्य  

चिगोरात तिंतिणी ही…  रेणुका धनंजय मार्डीकर ☆

(भावगीत (वर्ण संख्या १६ यति ८ व्या अक्षरावर))

☆

वसंताने आणलेली ग्रीष्मात बहरू येते 

चिगोरात तित्निणी ही रंगरूप नवे घेते ||ध्रु||

*

चिमण्याश्या लाल कळ्या पर्ण पाचूत सजल्या

सोनं पांढऱ्या पाकळ्या फुलोऱ्यात त्या रुजल्या

पाकळ्यांना छेडण्यास मधमाशी डंख देते

चिगोरात तिन्तिणी ही रंगरूप नवे घेते ||१||

*

दीर्घायुषी तरूवर दिसतात मनोहर

हरितपर्णिकामधे सजे फुलोरा सुंदर

चिंचबने फुलारली मोहक दिसती शेते

चिगोरात तिन्तिणी ही रंगरूप नवे घेते ||२||

*

कधी वाटे भरजरी अंगावरली शेलारी

शालू नेसून नवरी नटलेली दिसे न्यारी

गीत सुमधूर माझे चिंचेखाली मला नेते

चिगोरात तिन्तिणी ही रंगरूप नवे घेते ||३||

*

चिरमिर पानांच्या या अक्षताच पडतात

फुलोऱ्याची फुले त्यात पायघड्या घालतात 

छोटे छोटे डोकावती अम्लकीचे आकडे ते

चिगोरात तिन्तिणी ही रंगरूप नवे घेते ||४||

☆

© रेणुका धनंजय मार्डीकर

औसा.

मोबा. नं.  ८८५५९१७९१८

≈संस्थापक संपादक – श्री हेमन्त बावनकर/सम्पादक मंडळ (मराठी) – उज्ज्वला केळकर/श्री सुहास रघुनाथ पंडित / मंजुषा मुळे/ गौरी गाडेकर≈