Marathi Kavita
सुश्री नीलांबरी शिर्के
चित्रकाव्य
रांगोळी अशी ही… सुश्री नीलांबरी शिर्के ☆
☆
निळ्या आभाळी
नाजुक रांगोळी
रेखिलीय कोणी
सकाळी सकाळी!!
*
वारा वाहे तशी
बदलते नक्षी
आभाळ अंगण
तयासाठी साक्षी!!
*
रंग रांगोळीचा
फिकट लिंबोळी
निळ्या लिंबोळीची
आगळी ही खेळी!
*
रंगसंगती ही
मना पाडी भूल
आभाळाचं चित्र
मनात रेखलं!!
☆
© सुश्री नीलांबरी शिर्के
मो 8149144177
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री प्रमोद वामन वर्तक
चित्रकाव्य
☆ वेड्याला वेळीच आवरा… ☆ श्री प्रमोद वामन वर्तक ☆
☆
लोटून जगाला भयंकर
तिसऱ्या महायुद्धाच्या खाईत
वेडा “तात्या” स्वतः निघाला
आरूढ होण्या मुद्रेवर घाईत
*
जगात डागाळलेली प्रतिमा
स्वच्छ होईल कां स्वर्णमुद्रेने?
अहंकाराचा मेरूमणी म्हणून
पूर्वीच ओळखले त्या जगाने
*
बगल मारून कायद्याला
“तात्या” स्वर्णनाणे छापणार
स्वतः नरकवासी झाला तरी
शिक्का बनून अमर राहणार
*
द्यावी सु्बुद्धी लवकर त्याला
आज विनवितो मी येशूला
नाहीतर एका ठार वेड्यामुळे
अंत जगाचा तो ठरलेला
अंत जगाचा तो ठरलेला
☆
© प्रमोद वामन वर्तक
संपर्क – दोस्ती इम्पिरिया, ग्रेशिया A 702, मानपाडा, ठाणे (प.) 400610
मो – 9892561086 ई-मेल – pradnyavartak3@gmail.com
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
कविराज विजय यशवंत सातपुते
कवितेचा उत्सव # २८७ – विजय साहित्य
☆ कविता माझी…! ☆
(अक्षरछंद, दशाक्षरी (५..५), ३२ ओळी)
☆
कविता माझी, अनावृत्त ती
शब्द फुलांनी, आलंकृत ती
अनुभवांची,अनूभूतींची
प्रतिभा शक्ती,सालंकृत ती. १
*
नांदत आहे, कविता माझी
दूर करीते, बघ नाराजी
वाचत जाई, माणसांस ती
शब्द फुलांची, परडी ताजी.२
*
कधी बोलते, कधी वाचते
गूज मनीचे, कधी सांगते
सुख दुःखाचे, पैंजण पायी
कधी हासते, कधी नाचते.३
*
कविता माझी,श्वास बोलका
अंतरातला, शब्द शेलका
नाव गाव नी, वाव देऊनी
जाते ठेऊन, अर्थ नेमका.४
*
आशयारुढ, शब्दांकीत ती
कल्पकतेने, अर्थांकीत ती
फुले तितिक्षा, खुले कविता
रविशलाका,स्नेहांकीत ती.५
*
कविता माझी, शब्द प्रतिमा
सृजनतेचा, चढे लालिमा
कधी आरसा,कधी वारसा
संजीवक ती, ही मधुरिमा.६
*
कविता माझी पारिजातक
भाव भावना, होती व्यापक
मनी तितिक्षा, कविराजांची
कलागुणांचे, दैवी द्योतक…!७
*
शब्द पालखी,पहा निघाली
अक्षर लेणी, उदया आली
प्रकाशपर्वी, रसिकांसाठी
शब्द सेतूने, प्रचूर झाली…!८
☆
© कविराज विजय यशवंत सातपुते
सहकारनगर नंबर दोन, दशभुजा गणपती रोड, पुणे. 411 009.
मोबाईल 8530234892/ 9371319798.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुश्री संगीता कुलकर्णी
कवितेचा उत्सव
☆ पालवी… ☆ सुश्री संगीता कुलकर्णी ☆
☆
जुन्या पानांच्या राखेतून
नव्या ऋतूची चाहूल येते
वाऱ्याच्या अलगद स्पर्शाने
कोवळी पालवी डोळे उघडते
वेदनेच्या सावलीत आशेचा दिवा पेटतो
कोरड्या फांदीच्या छातीतून
हिरवा श्वास अलगद फुटतो
मातीच्या कुशीत दडलेले
स्वप्न हळूच अंकुरते
सूर्याच्या सोनसळी नजरेत
जीवन पुन्हा उमलते
वादळे येवोत कितीही
धैर्य मुळांना धरून राहते
आणि एका शांत पहाटेला
नव्या जगाची पालवी फुटते
कारण…
प्रत्येक अंताच्या दाराशी
एक सुरुवात उभी असते
जिथे विश्वासाच्या मातीतून
उद्याची हिरवी पालवी जन्मते.. ।
☆
© सुश्री संगीता कुलकर्णी
लेखिका /कवयित्री
ठाणे
9870451020
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
अर्चना गादीकर निकारंगे
कवितेचा उत्सव
☆ विचारणा… ☆ अर्चना गादीकर निकारंगे ☆
☆
हळूच विचारले मनाला, ” भावले का तुला? “
विलंब न करता उत्तरले, ” प्रश्न हा का झाला? “
म्हटले, ” किती सुंदर वाटतोय निसर्ग हा! “
बोलते झाले, ” अशीच नेहमी अवलोकीत राहा. “
*
थंडगार वार्याची झुळूक, पक्ष्यांचे मधुर बोल,
हे भावत असते मनात खूप खोल.
सुंदर हे वातावरण प्रसन्न करते मनास,
पहावे त्याला रोज ह्रदयी असतो एक ध्यास.
*
साधेसुधे असे हे प्रसंंग आनंद देतात,
पाहताच त्यांना नकळत मनाचा ताबा घेतात.
निस्वार्थी भावनेने निसर्ग रोज देत असतो,
परतफेडीचा प्रश्न तिथे अस्तित्वात नसतो.
☆
© अर्चना गादीकर निकारंगे
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
रेणुका धनंजय मार्डीकर
चित्रकाव्य
गगनजाई रूपवती… रेणुका धनंजय मार्डीकर ☆
(भावगीत)
☆
येता ऋतूगंध खास, फुले येती बहरास
पाय माझे तिथे घुटमळती
शरदाच्या चांदण्यात, हेमंतातली पहाट
गगनजाई रूपवती
उंच उंच तरू देखणे
पानात रुपेरी चांदणे
झुपक्यात फुलांचे नांदणे
पाचूला श्वेतांगी गोंदणे
हा वारा येता येता, सुगंधाच दान देता
माझ्या मनास मोहवती
नभात रातीची चांदणी
भुलली पाहून रजनी
भेटण्या आतुर धरणी
सुगंध घेऊन अंगणी
बकावली फुलणारी, फुले भिरभिरणारी
वळेसरात गंधवती
पाटलीनबाई दिसते भारी
गगनमल्लीगे चमचमणारी
धवल चंद्रिका दिसते न्यारी
मन गाभारी रुजली सारी
दृष्ट काढूया का याची, याच्या देखण्या रुपाची
ओंजळीत माझ्या किती खुलती
आकाशमोगरा कुणी म्हणे
बुचाच्या फुलात हिला गणे
आकाशनीमास देखणे
लाभले चंदेरी चांदणे
मन बालपणी जाते, त्याचे माझे गोड नाते
कवने ओठी मज स्मरती
☆
© रेणुका धनंजय मार्डीकर
औसा.
मोबा. नं. ८८५५९१७९१८
≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
श्री प्रमोद वामन वर्तक
चित्रकाव्य
☆ मनमोहन! ☆ श्री प्रमोद वामन वर्तक ☆
☆
दुबोटी गंध भालावरचे
वाढवी मुखाची शान,
धरता अधरी मुरली
शाम विसरे स्वभान!
*
शोभे शिरावर नक्षीदार
सुवर्ण मुकुट साजिरा,
नाजूक गोंडस मोरपीस
दावी त्याचा बघा तोरा!
*
कानी डुलती कुंडले
कंठी नवरत्नांची माला,
नाजूक त्याच्या कटीवर
दिसे शोभून मेखला!
*
सोनेरी घट्ट पितांबर
माधव आहे नेसला,
स्कंधावरून घेतला
त्याने साजेसा शेला!
*
पाहून रूप कृष्णाचे
भान कुणाचेही हरावे,
नयनात साठवून मूर्ती
दिन रात हरीला भजावे!
दिन रात हरीला भजावे!
☆
© प्रमोद वामन वर्तक
संपर्क – दोस्ती इम्पिरिया, ग्रेशिया A 702, मानपाडा, ठाणे (प.) 400610
मो – 9892561086 ई-मेल – pradnyavartak3@gmail.com
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुश्री प्रभा सोनवणे
कवितेच्या प्रदेशात # ३०७
☆ चैत्र गौर… ☆ सुश्री प्रभा सोनवणे ☆
☆
हे दुर्गादेवी… जगत जननी
सा-या संसाराची वरदायिनी
*
तू शक्ती.तू अंबिका..तू सौदामिनी
माझ्या मनावर सदा तुझी मोहिनी
*
तू सौंदर्या, मृगनयनी , सुकेशिनी
सती, शैलपुत्री,चंडिका, शुभांगिनी
*
आई पार्वती,उमा,गौरी,कात्यायनी
अनेक नावे… परी तू माझी भवानी
*
कलियुगातली तू आहेस तारिणी
अवघ्या विश्वाची तू ….उद्धारिणी
*
आम्ही तहानलेले… तू तरंगिणी
तू कालरात्री आणि तूच शिवानी
*
चैत्र नवरात्रीत तूच माझी स्वामिनी
सदा तू प्रसन्न असावेस या जीवनी
☆
© प्रभा सोनवणे
संपर्क – “सोनवणे हाऊस”, ३४८ सोमवार
पेठ, पंधरा ऑगस्ट चौक, विश्वेश्वर बँकेसमोर, पुणे 411011
मोबाईल-९२७०७२९५०३, email- sonawane.prabha@gmail.com
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री सुहास रघुनाथ पंडित
कवितेचा उत्सव
☆ हे मृत्यो... ☆ श्री सुहास रघुनाथ पंडित ☆
☆
फक्त एकदा मला पाहू दे हिमशिखरांच्या उत्तुंग राशी
फक्त एकदा मला पाहू दे तोरण गगनी इंद्रधनुष्यी
फक्त एकदा मला पाहू दे वसंत पुलकित हिरवी राने
फक्त एकदा मला ऐकू दे वसंतातले कोकीळ गाणे
*
निळ्या नभातील रंगपंचमी मला पाहू दे फक्त एकदा
गिरीशिखरातील निर्झर संगीत मला ऐकू दे फक्त एकदा
शिशिरामधला पहाट वारा मला घेऊ दे फक्त एकदा
रेशीम वस्त्रे चंद्राची ती मला लेऊ दे फक्त एकदा
*
कोसळणा-या सहस्रधारांमध्ये नाहू दे फक्त एकदा
अन् मातीच्या कुशीत शिरूनी मला राबू दे फक्त एकदा
फक्त एकदा मला पाहू दे अवघ्या सृष्टीमधला ईश्वर
फक्त एकदा मला मरु दे इथले जगणे सरल्यानंतर
☆
© श्री सुहास रघुनाथ पंडित
सांगली (महाराष्ट्र)
मो – 9421225491
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री अशोक श्रीपाद भांबुरे
अशोक भांबुरे जी यांची कविता अभिव्यक्ती # ३२१
☆ गुणगान माझे… ☆ श्री अशोक श्रीपाद भांबुरे ☆
(चाल : पुकारता चला हूँ)
☆
विचारणा करायची
माझ्यावरी मरायची
खुशालचेंडू मी असा
उगाच ती झुरायची
*
विचारणा करायची
माझ्यावरी मरायची
खुशालचेंडू मी असा
उगाच ती झुरायची
विचारणा करायची
*
मैत्रिणीच्या सोबती असायची
उठून त्यांत तीच तर दिसायची
मैत्रिणीकडे तिच्या मी पाहता
व्यर्थ का ती दात ओठ खायची
विचारणा करायची
माझ्यावरी मरायची
खुशालचेंडू मी असा
उगाच ती झुरायची
विचारणा करायची
*
मीही चोरुनी तिला पाहातसे
अनंत काळजावरी तिचे ठसे
गप्प ती तरीही कान ऐकती
अखंड गुणगान माझे गायची
विचारणा करायची
माझ्यावरी मरायची
खुशालचेंडू मी असा
उगाच ती झुरायची
विचारणा करायची
माझ्यावरी मरायची
☆
© अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
