Category: कवितेचा उत्सव 2

श्रीशैल चौगुले

 कवितेचा उत्सव 

☆ गावाकाठचा ओढा – श्रीमंतांचा घोडा... ☆ श्रीशैल चौगुले ☆

☆

शहरी नाट्य ओढ्याला गिळत आहेत

श्रीमंत नेते गावाला गिळत आहेत.

 *

हिमतीचा शिवाजी सत्तापिसाट आहे

धोरणीबाज राक्षसा अहंः अचाट आहे.

 *

सारा स्वाभिमान पुढार्यांस गहाण आहे

जाणीवपूर्वक छळणारा महान आहे.

 *

भुकंप-सुनामी कोप कळतोच कुणा येथे

माणसाची व्याख्या लाचखोरीत बेभान आहे.

 *

अधिकारी नेते चंगळ अतिरेकात आहे

धमकी दादागिरीत गांधीवाद शांत आहे.

 *

ज्याला त्याला अमिषाची चाड निती ज्ञात आहे

गाव संपताना नथुराम आरामात आहे.

 *

देशाचा विसर, विदेशवादात दंग आहे

नव्या पिढीचे कारण चार्वाकाचा ढंग आहे.

☆

© श्रीशैल चौगुले

श्री आशिष  बिवलकर

  चित्रकाव्य  

इथे ओशाळली माणुसकी  श्री आशिष  बिवलकर ☆

☆

माणुसकी ओशाळली,

संस्कार ही थिजले |

वयाची ही न जाण,

अधिकारी हे कसले |

*

वृद्ध कष्टाळू माऊली ती,

नियम कायदा नसे माहित |

रस्त्यावर विकून भाजी,

सोडवी पोटापाण्याचे गणित |

*

कर्तव्यदक्ष धृतराष्ट्र पालिकेचे,

न दिसली तिच्यात त्यांना आई |

कारवाईचा बडगा कठोर ऐसा,

नासधूस सारी, कशाची ही घाई |

*

गाडीत गॉगल लावून साहेब,

गोरगरिबांच्यावर नुसता रुबाब |

घरात नसेल म्हातारी आई त्याच्या,

श्रीमुखात देऊन विचारावा जाब |

*

अतिक्रमण हटाव मोहिमेत,

सगळीकडे चालतो दुजाभाव |

चिरीमिरी, हप्ते वसुली सर्रास,

परप्रांतीयांसाठी चाले धावाधाव |

©️ वास्तवरंग

☆

(चित्र सौजन्य – श्री आशिष बिवलकर) 

© श्री आशिष  बिवलकर

बदलापूर

मो 9518942105

≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री तुकाराम दादा पाटील

 कवितेचा उत्सव 

☆ भैरवी… ☆ प्रा तुकाराम दादा पाटील ☆

(स्त्रग्विणी – गालगा गालगा गालगा गालगा)

☆

 चूक जाणून घे पाप वाटून घे

ताप झाला तरी शाप भोगून घे

* 

काय आहे कमी सांग सारेच तू

लाज पाळू नको काम मागून घे

 *

खेळ खेळून जा मागचा तू पुन्हा

नेमका एक तू डाव टाकून घे

 *

पाहणारा नवी आस ठेवील ना

श्वास रोखून घे अंग झाकून घे

 *

आठवांचा तुझ्या बांध फोडू नको

खोल पाणी तिथे शांत न्हाऊन घे

 *

जीवनाची नशा वेड लावी मना

ताल सोडू नको फक्त नाचून घे

 *

अंत आहे पुढे टाळ त्याला जरा

सांग थांबायला वेळ टाळून घे

 *

थोरवी तू तुझी फार सांगू नको

जाणत्यांच्या पुढे मौन पाळून घे

 *

व्यर्थ कोणासही दोष लावू नको

कोण आहेस तू हेच पाहून घे

 *

ध्यास आहे तुला भैरवी गायचा

सूर छेडायला साज लावून घे

 ☆

© प्रा. तुकाराम दादा पाटील

मुळचा पत्ता  –  मु.पो. भोसे  ता.मिरज  जि.सांगली

सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३

दुरध्वनी – ९०७५६३४८२४, ९८२२०१८५२६

≈ संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री अनिल वामोरकर

कवितेचा उत्सव

☆ जीवन… ☆ श्री अनिल वामोरकर ☆

☆

रंगूनी रंगात

अवघा रंग

मी श्रीरंग

एकरूप…

मी अन् तू

नच उरलो

तरलो तरलो

भवसागर…

तूझे अस्तित्व

मज साठी

तू जगजेठी

ब्रह्मांडाचा…

श्वास निःश्वास

एका सोडावे

दूजा धरावे

नामस्मरण…

☆

© श्री अनिल वामोरकर

अमरावती

≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

मंजुषा सुनीत मुळे

 कवितेचा उत्सव 

☆ “ये ना सखी गं…” ☆  मंजुषा सुनीत मुळे  ☆

☆

संध्येसंगे ये ना सखे गं.. ज्योती संगे ये

ती प्रीत कोवळी मनातली.. डोळ्यात तेववीत ये..

 *

गुलमोहर फुलता फुलतांना.. उधळे दशदिशी जी लाली

गाली सजवून तिला आपल्या.. फुलूनच तूही ये..

 *

क्षितिजावरती सूर्य टेकता.. नभांगणी हळू चंद्र डोकवे

रुणझुणत्या अलगद पायी.. मम मनी डोकावत ये..

 *

चंद्रास पाहुनी ऊर्मी सागरी.. ती मी घेऊन आलो

चंद्रिका होऊनी प्रेमाचे चांदणे तू उधळत ये..

 *

शामरंगी रंगे जशी ही.. सृष्टी आतुरतेने

हृदयात तुझ्या त्या आतुरतेला जपतच तूही ये..

 *

हाक जी वर्षेला मोराची.. वसंतास जशी कोकिळ-साद

तन मन मम जणू तीच आर्तता.. बहर तू होऊन ये..

 सखी गं बहर तू होऊन ये…

☆

© मंजुषा सुनीत मुळे

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री प्रमोद वामन वर्तक  

  चित्रकाव्य  

गजरा!   श्री प्रमोद वामन वर्तक ☆

☆

काळ सारा उमेदीचा

कष्ट करण्यात सरला,

हवा होता जेंव्हा तुला

गजरा नाही माळला!

*

 हौस मौज सारे काही 

 मी बासनात बांधले,

 करून संसार टुकीने

 कुटुंबाचे हित साधले!

*

कधी न करता कुरकुर

दिलीस आनंदाने साथ,

आज माळतांना गजरा

थरथरतो माझा हात!

*

 नसतीस तू साथीला

 होता खडतर प्रवास,

 साथ मिळो सातजन्मी

 ही प्रार्थना परमेश्वरास!

 ही प्रार्थना परमेश्वरास!

☆

© प्रमोद वामन वर्तक

संपर्क – दोस्ती इम्पिरिया, ग्रेशिया A 702, मानपाडा, ठाणे (प.) 400610 

मो – 9892561086 ई-मेल – pradnyavartak3@gmail.com

≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

उज्वला सुहास सहस्रबुद्धे

 कवितेचा उत्सव 

☆ गुलमोहर… ☆ उज्वला सुहास सहस्रबुद्धे ☆

☆

गुलमोहरा, गुलमोहरा,

 फुलवलास तुझा पिसारा!

जेव्हा पसरून येतोस तू,

 उधळीत तुझा रंग सारा! . १

* 

पानां पेक्षा रंग बेरंगी,

 फुलांचा गुच्छ तो बहुढंगी!

उष्ण झळा उन्हाच्या झेलीत,

 उभा रहातो तू पहात संधी! .. २

 *

 ना गंध, ना रूप दिसेना,

तुझ्याच या पुष्प गुच्छांना!

तरीही माझे प्रेम तुझ्यावर,

 झेलतो तू रविकिरणांना! .. ३

 *

 वर्षातील ते सारे महिने,

 असतोस तू उभा एकाकी!

 रवि राजाच्या सोबत दिसे,

 रंग तुझा तो एकाएकी! .. ४

 *

तुझ्या कडून शिकत रहावे,

जीवन अपुले कसे असावे,

 कधी निष्पर्ण, तर कधी मोहक,

 जसे मिळेल ते जगत रहावे! .. ५

☆

© उज्वला सुहास सहस्रबुद्धे

वारजे 

≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्रीशैल चौगुले

  चित्रकाव्य  

☆ अंतिम क्षण मातृत्वाचे… ☆ श्रीशैल चौगुले ☆

☆

गंगेच्या कुशीत सुखावले

माय-लेकरु दैवगतीचे

कसा जिव्हाळा एक जाहला

अंतिम क्षण मातृत्वाचे.

*

नाही कसले दुःख अपार

भाव जन्माचे शांत-शांत

हृदय बंद-जिवंत आत्मा

पुण्य म्हणावे का एकांत.

*

आक्रोश न कसला जीवाचा

प्रारब्ध भोग मानवलोकी

मातेची माया कशी कळावी

निष्पाप लेकरू मृत्यूनौकी.

☆

© श्रीशैल चौगुले