सुश्री नीलांबरी शिर्के
चित्रकाव्य
☆ लावण्यखणी… ☆ सुश्री नीलांबरी शिर्के ☆
☆
कर्णभुषणे
किती देखणी
झाडच वाटे
लावण्यखणी
*
सजते सौंदर्य
याहून दुसरे
पाहिले का
असेल कोणी!
☆
© सुश्री नीलांबरी शिर्के
≈संस्थापक संपादक – श्री हेमन्त बावनकर/सम्पादक मंडळ (मराठी) – उज्ज्वला केळकर/श्री सुहास रघुनाथ पंडित /मंजुषा मुळे/गौरी गाडेकर≈
चित्रकाव्य
पहावा.. बहावा — विषय एकच.. चित्रे तीन.. काव्ये तीन १. सुवर्णधुंद — विभावरी कुलकर्णी २. लावण्यशोभा — डॉ. ज्योती गोडबोले ३. बहावा फुलला — डॉ. मधुवंती कुलकर्णी ☆
☆
विभावरी कुलकर्णी
(१ )
☆ सुवर्णधुंद… ☆
रात्रीच्या गर्द अंधारात,
नक्षत्रांचे लेणे ल्याला,
अमलतास हा सुवर्णतेजाने,
बघा कसा न्हाऊन निघाला…
*
काळ्याभोर नभाच्या खाली,
पिवळ्याधमक फुलांचे झुंबर,
गच्च दाटला पिवळा रंग हा,
जणू धरतीवर उतरले अंबर…
*
कोवळी मोहक सुवर्ण वर्षा,
मनास देई अनोखी साद,
स्तब्ध शांत या निशेमध्ये,
जागृत झाला हा उन्माद…
*
पानगळीच्या शुष्क फांदीवर,
फुलांचे हे वैभव ल्यावे,
माणसानेही आयुष्यात असेच,
कष्टातून ‘सुवर्ण’ होऊन फुलावे…
☆
© विभावरी कुलकर्णी
मेडिटेशन,हिलिंग मास्टर व समुपदेशक, संगितोपचारक.
सांगवी, पुणे
– ८०८७८१०१९७
☆☆☆☆
डॉ. ज्योती गोडबोले
(२)
☆ लावण्यशोभा… ☆
☆
पिवळा जर्द तरु असा बहरला, सौंदर्य त्याचे पहा
गालिचा जणु अंथरून बघतो, लावण्यशोभा अहा…
*
भंडारा उधळीत येई जणु तो, मल्हारि भेटी जसा
सृष्टीला बहु हर्ष होई करुनि, शृंगार सारा असा…
*
टपटप वर्षत ही फुले चिमुकली, बहरून येतो जरी
अल्पायुष्य मिळे तया तरिही तो, चिंता कधी ना करी…
☆
© डॉ. ज्योती गोडबोले
☆☆☆☆
डाॅ. मधुवंती कुलकर्णी
(३)
☆ बहावा फुलला… ☆
☆
ग्रीष्माचा तो चटका पाहून
असह्य झाली अवघी धरती
थेंब टपोरे येतिल कधी ते
वाटे आशा उगाच झुरती
*
थोडी हिरवळ पाहून नेत्री
तरंग उठती अवघ्या गात्री
गार सावल्या शोधत आल्या
तरूतळी पण उदास धात्री
*
एके दिवशी उजाडताना
पक्षी करती किलबिलाट मग
उघडताच लोचने पृथेने
दिसते सुंदर पीतवर्ण जग
*
कोण उमलले आकाशी या
तरूही गाती आनंदाने
घुंगुर काठी वाजत कैसी
वाऱ्याची का शीळ खुशीने
*
अचंबित ती होता ऐसी
सुगंध वहातो फुलाफुलांतुनि
फुलत “बहावा “सांगत येई
पाऊस नाचे मृद्गंधांतुनि
(असं म्हणतात की बहावे फुलले की महिन्याभरात पाऊसकाळ येतो.)
☆
© डॉ. मधुवती कुलकर्णी
बेंगलोर
दूरध्वनी ९४०३००६४३६.
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
चित्रकाव्य
(१) बुद्धीला ताळमेळ नाही… (२) निरक्षर चोर ? (३) माया पुस्तकांची… >> चित्र एक.. काव्ये तीन श्री आशिष बिवलकर, श्री प्रमोद वामन वर्तक आणि सुश्री वर्षा बालगोपाल ☆
☆
श्री आशिष बिवलकर
(१ )
☆ बुद्धीला ताळमेळ नाही… ☆
*
दारूचा ट्रक उलटला,
लुटायला उडते झुंबड |
पुस्तकांचा ट्रक उलटला,
बघाया कुणा नाही सवड |
*
विश्वगुरु म्हणून पूर्वजांनी,
जपली ज्ञानाची ग्रंथसंपदा |
बख्तियार खिल्जीने जाळले,
सहा महिने जळत होते नालंदा |
*
पुस्तकं ग्रंथ वाचायला,
कोणाकडे आता वेळ नाही |
रद्दी म्हणून बघायचीच दृष्टी,
बुद्धीला आता ताळमेळ नाही |
*
कपाटात अडगळीत स्थान,
हीच मोठी शोकांतिका आज |
वागावे कसे, घडावे कसे,
कशाचीही ना उरलीय लाज |
*
‘वाचाल तर वाचाल,’
या उक्तीला ना उरला अर्थ |
घड्याळाच्या काट्यावर सारं,
जीवन होतं चाललय व्यर्थ |
☆
कवी : श्री आशिष बिवलकर
बदलापूर
मोबाईल – 9518942105
☆☆☆☆
श्री प्रमोद वामन वर्तक
(२)
☆ निरक्षर चोर ? ☆
*
नवे नाहीत अपघात
आपल्या सगळ्यांना
पण या अपघाताचा
वेगळाच पहा नमुना
*
धन शब्द साहित्याचे
सारे विखरे रस्त्यावर
लुटण्या अक्षरांची पुंजी
आला नाही कोणी चोर
*
अपघातग्रस्त ट्रकात
असती जर कां वारुणी
समस्त लोकांच्या उड्या
पडल्या असत्या झणी
*
आता तरी मान्य करा
वाचन संस्कृती लोपली
“हातातल्या जादूगाराने”
पुस्तकांवर मात केली
पुस्तकांवर मात केली
☆
© श्री प्रमोद वामन वर्तक
मानपाडा, ठाणे (प.) ४००६१०
मो – ९८९२५६१०८६
☆☆☆☆
वर्षा बालगोपाल
(३)
☆ माया पुस्तकांची… ☆
*
सरिता पुस्तकांची व्याकुळ झाली
मुलांना भेटण्या रस्त्यावर आली
मुलांची ममता का आटून गेली
नजर पडूनही कीव न आली ||
*
शिकवले घडविले ज्या मातेने
उच्च पदी गेला तुम्ही ज्या वाटेने
त्या मातेची, वाटेची, साद ना ऐकली
नजर पडूनही कीव न आली ||
*
एका आठवास हृदयी धरावे
एका आठवास उचलोनी घ्यावे
ईच्छा ही साधीच तुला न कळली
नजर पडूनही कीव न आली ||
*
आपला न कोणी नुरला का त्राता
पोरकी नदी बोलकी झाली आता
उरफाटी जनरीत नुरे वाली
नजर पडूनही कीव न आली ||
*
नका करू चिंता माझ्या लेकरांनो
गाडले जाऊ असे ऐका बांधवांनो
जरी आज तुम्ही कीव नाही केली
वन पुस्तकांचे देईल सावली ||
☆
© वर्षा बालगोपाल
मो 8830084184
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री आशिष बिवलकर
चित्रकाव्य
हौसेचं फसलेलं गणित... श्री आशिष बिवलकर ☆
☆
लग्नात कपड्याच्या हौसेला,
पैशाचं मोल कधीच ते नसतं |
कोपलेल्या सूर्यनारायणापुढे,
मात्र हौसेचं गणित मात्र फसतं |
*
रेमंडचा थ्री पीस सूट शिवून,
लग्नात ऐटीत होता मिरवणार |
मुलीकडच्यांची पोशाखात,
नवरदेव म्हणाला जिरवणार |
*
इतकी वर्षे रखडलेला उपवर,
यंदा मात्र नशिबाने लग्न जुळलं |
समोरची पार्टी पैशाने मजबूत,
तिथंच गड्याचं नशीब फळलं |
*
बँडबाजा वरात सनई चौघडा,
हट्टाने मान्य करुन घेतलं मागून |
वैशाखातच चांगला मुहूर्त आहे,
थाटात लग्न बैठकीत गेला सांगून |
*
वैशाख वणव्यात थ्री पीस सोडा,
चड्डी बनियान घालून तो पाटावर |
पाहून लग्न सोहळा वऱ्हाड्यांनी,
यथेच्छ ताव तो मारला ताटावर |
©️ वास्तवरंग
☆
(चित्र सौजन्य – श्री आशिष बिवलकर)
© श्री आशिष बिवलकर
बदलापूर
मो 9518942105
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री प्रमोद वामन वर्तक
चित्रकाव्य
प्रेमसखा! श्री प्रमोद वामन वर्तक ☆
☆
रंगारी साऱ्या दुनियेचा
धरून बैसला कुंचला,
चितारी तन्मयतेने मग
हृदयी वसल्या राधेला!
*
कर्णफुले कानी दोन
प्रेम रंगात रंगवली,
नील कांती मुखावरची
खुलवी ओठांची लाली!
*
मुग्ध भाषा दो नयनांची
सौन्दर्य मुखाचे वाढवी,
बिंदीसवे कनक मुकुट
केशसंभार तो खुलवी!
*
प्रेम नजरेने बघता तिला
वाटे आत्ता जिवंत होईल,
दिसता प्रेमसखा सामोरी
मिठीत त्याच्या विरघळेल!
मिठीत त्याच्या विरघळेल!
☆
© प्रमोद वामन वर्तक
संपर्क – दोस्ती इम्पिरिया, ग्रेशिया A 702, मानपाडा, ठाणे (प.) 400610
मो – 9892561086 ई-मेल – pradnyavartak3@gmail.com
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री आशिष बिवलकर
चित्रकाव्य
नराधम... श्री आशिष बिवलकर ☆
☆
वासनाधुंद्याने | कळी चिरडली |
ती तडफडली | प्राणांतिक ||१||
*
नराधम वृद्ध | परोल सुटका |
वासना घटका | अत्याचार ||२||
*
विकृत वावरे | ऐसे समाजात |
करतात घात | कोवळ्यांचा ||३||
*
आंधळा कायदा | कुर्मगती न्याय |
पीडितांचा पाय | खोलातच ||४||
*
ज्ञात अज्ञात त्या | असंख्य निर्भया |
प्रतीक्षेत न्याया | दुर्लक्षित ||५||
*
नेहमीच कैसी | तिचीच शिकार |
करावा धिक्कार | विकृतांचा ||६||
*
भर चौकातच | घाला त्यास गोळी |
व्हाव्या पोरीबाळी | सुरक्षित ||७||
©️ वास्तवरंग
☆
(चित्र सौजन्य – श्री आशिष बिवलकर)
© श्री आशिष बिवलकर
बदलापूर
मो 9518942105
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुश्री नीलांबरी शिर्के
चित्रकाव्य
नाळ धरतीशी !! सुश्री नीलांबरी शिर्के ☆
☆
किती कापा कसेही तोडा
आपसूक झाडा येई फुटवा
जोवर गच्च नाळ धरतीशी
तोवर वृक्ष नित राही हिरवा!!
*
तीच भरविते घास मुखी अन्
मुळातुनी वाढ म्हणुनी ऊर्जा
मातीमायच खतपाणी देऊनी
म्हणते निसर्ग समतोल राख जा!!
*
सकला देतो सावली नीत्य मी
फळे, फुले, चाराही पुरवितो
तरीही का ही कुऱ्हाड देहावर
प्रश्न मला नित छळत राहतो!!
☆
© सुश्री नीलांबरी शिर्के
मो 8149144177
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
रेणुका धनंजय मार्डीकर
चित्रकाव्य
सीतामुडी किती निराळी… रेणुका धनंजय मार्डीकर ☆
☆
सरसर पाऊस येताना
झरझरती रेशीम धारा
आंबा फणसावर फुलतो
मनमोही सुखद नजारा
*
लतिकेने वृक्षावरती
गजराच माळला भासे
सीतावेणी लडिवाळे
जणू हळूच खुदकन हासे
*
गुलबिल्या अंगाची ही
श्वेतांगीशी फुलवंती
गजऱ्यात हिच्या रुपाची
किती लाभलीच श्रीमंती
*
आमरी म्हणती हिज कोणी
सीतामुडी किती निराळी
पानसकोळी ही सुंदर
कोकणात हिची झळाळी
*
द्रौपदी माला सजलेली
गजऱ्यात फुले ही शंभर
चिमणी श्वेतांगी सुमने
जांभूळली त्यावर झालर
*
किती भाग्यच या वेणीचे
प्रेमाचे प्रतिक झाली
कुंतली माळता तिजला
मग नवी झळाळी ल्याली
*
किती सुगंध गोजिरवाणा
मन माझे पिंगा घाली
शब्दांची फुलपाखरणी
कविता जन्माला आली
☆
© रेणुका धनंजय मार्डीकर
औसा.
मोबा. नं. ८८५५९१७९१८
≈संस्थापक संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुश्री ज्योत्स्ना तानवडे
चित्रकाव्य
– मनमुक्त मी…! – ☆ सुश्री ज्योत्स्ना तानवडे ☆
☆
सुख स्वप्नांचे रंग मी
अंगावर पांघरले
फुलपाखरांचे थवे
सभोवती अवतरले ||
*
स्वप्नांची फुलपाखरे
मनी रुंजी घालतात
मनावरती हलकेच
मोरपीस फिरवतात ||
*
आनंदी घराची मी
सिद्धहस्त स्वामिनी
गृहसौख्य फुलविणारी
गृहदेवता भामिनी ||
*
मी सौंदर्याची राणी
आत्मानंदात रमते
माझे आत्मतत्त्व मी
मनमुक्ततेत जपते ||
*
मी देवाची निर्मिती
मी निर्मितीची खाण
सुख स्वप्नात सुद्धा
नसे कशाची वाण ||
☆
© सौ.ज्योत्स्ना तानवडे
वारजे, पुणे.५८
≈ संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री आशिष बिवलकर
चित्रकाव्य
आयुष्याच्या संध्याकाळी... श्री आशिष बिवलकर ☆
☆
आयुष्याच्या संध्याकाळी,
ही भिंत फक्त आड आहे |
सरले कित्येक ऊन पावसाळे,
तुझी माझी मैत्री जीवापाड आहे |
*
दोन घरात, दोन अंगणात,
या भिंतीची आडवी रेष आहे |
गात्र जरी थकलीत आपली,
एकमेकांच्या ओढीचा आवेश आहे |
*
उभ्या असलेल्या भिंती पलीकडे,
तुझ्या मैत्रीचा तो विरंगुळा आहे |
हितगुज करतानाचा तुझा माझा,
आठवणींत रमण्याचा नाद खुळा आहे |
*
अवघाची संसार हा केला,
सुखी समाधानी परिवार आहे |
भरल्या ताटावर जरी बसलोत,
खेळीमेळीचे उरले दिवस चार आहे |
*
डोळे जरी पैलतिरी लागलेत,
समवयस्क म्हणून आधार आहे |
पिकलं पान कधी पण गळेल,
हा समज तुझ्यामुळे निराधार आहे |
©️ वास्तवरंग
☆
(चित्र सौजन्य – श्री आशिष बिवलकर)
© श्री आशिष बिवलकर
बदलापूर
मो 9518942105
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
