मराठी साहित्य – कवितेचा उत्सव ☆ रिकामे मधुघट…. ☆ भास्कर रामचंद्र तांबे

भास्कर रामचंद्र तांबे

कवितेचा उत्सव 

मधु मागशि माझ्या सख्या ,परी 

  मधुघटचि रिकामे पडती घरी /ध्रृ/

आजवरी कमळांच्या द्रोणी

मधु पाजिला तुला भरोनी,

सेवा ही पूर्विची स्मरोनी,

करि रोष न सखया,दया करी   //1//

नैवेद्याची एकच वाटी

अता दुधाची माझ्या गाठी ;

देवपुजेस्तव ही कोरांटी

बाळगी अंगणी कशीतरी  //2//

तरूण-तरूणिंची सलज्ज कुजबुज,

वृक्षझ-यांचे गूढ मधुर गूज,

संसाराचे मर्म हवे तुज,

मधु पिळण्या परी बळ न करी ! //3//

ढळला रे ढळला दिन सखया !

संध्याछाया भिवविती ह्रदया,

अता मधूचे नाव कासया ?

लागले नेत्र रे पैलतिरी  //4//

–  भास्कर रामचंद्र तांबे

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈